रूस र भ्याटिकनबीच मस्कोमा वार्ता, युक्रेन र मानवीय सहकार्य मुख्य विषय
ड्रागन मिडिया समाचार कक्ष
रूसी विदेशमन्त्री सर्गेई लाभरोभ र भ्याटिकनका राज्य तथा अन्तर्राष्ट्रिय संगठनसँग सम्बन्ध हेर्ने सचिव आर्चबिसप पल रिचर्ड गालाघरबीच मस्कोमा उच्चस्तरीय वार्ता भएको छ।
अगस्ट २५ मा भएको वार्तामा रूस र होली सीबीचको द्विपक्षीय सम्बन्ध, युक्रेनको अवस्था, मानवीय सहकार्य तथा विभिन्न क्षेत्रीय र अन्तर्राष्ट्रिय विषयमा विस्तृत छलफल भएको रूसी विदेश मन्त्रालयले जनाएको छ।
युक्रेन द्वन्द्वसँग सम्बन्धित मानवीय विषयमा भ्याटिकनले सक्रिय भूमिका खेल्दै आएकाले वार्तामा यस विषयले विशेष प्राथमिकता पाएको थियो। लाभरोभले संकटका मूल कारण समाधान नगरी दीर्घकालीन शान्ति सम्भव नहुने रूसी धारणा दोहोर्याएका छन्। उनले पश्चिमी मुलुकको नीतिले संकटलाई थप जटिल बनाएको आरोपसमेत लगाए।
रूसी पक्षले भ्याटिकनले अघि सारेका शान्तिमुखी प्रयासको सकारात्मक मूल्याङ्कन गर्दै मानवीय विषयमा दुई पक्षबीच भइरहेको सहकार्य जारी राख्ने इच्छा व्यक्त गरेको छ।
विशेष गरी युद्धका कारण अलग भएका परिवारलाई पुनर्मिलन गराउने तथा युद्धबन्दी आदानप्रदान सहज बनाउने पहलमा होली सीसँग निकट सहकार्य जारी राख्न रूस तयार रहेको लाभरोभले बताएका छन्।
वार्तामा परम्परागत आध्यात्मिक तथा नैतिक मूल्यको संरक्षण र विश्वका विभिन्न क्षेत्रमा रहेका इसाई समुदायको अवस्थाबारे पनि विचार आदानप्रदान भएको थियो।
रूसी विदेश मन्त्रालयका अनुसार केही क्षेत्रीय द्वन्द्वको समाधान तथा समकालीन अन्तर्राष्ट्रिय चुनौती सामना गर्ने विषयमा रूस र भ्याटिकनका दृष्टिकोणमा समानता रहेको उल्लेख गरिएको छ।
दुवै पक्षले नयाँ प्रविधि र कृत्रिम बुद्धिमत्ताको तीव्र विकासबाट उत्पन्न सामाजिक, नैतिक र अन्तर्राष्ट्रिय चुनौतीको सामना गर्न अन्तर्राष्ट्रिय समुदायबीच सहकार्य आवश्यक रहेकोमा समेत जोड दिएका छन्।
गालाघर अगस्ट २४ देखि २८ सम्म रूस भ्रमणमा छन्। भ्रमणका क्रममा उनले रूसी सरकारी अधिकारी, मस्को प्याट्रिआर्केटका प्रतिनिधि तथा रूसस्थित क्याथोलिक समुदायसँग भेटघाट गर्ने कार्यक्रम छ।
भ्याटिकनले उनको भ्रमणलाई संवाद र शान्तिमा केन्द्रित कूटनीतिक प्रयासका रूपमा प्रस्तुत गरेको छ। युक्रेन युद्ध लम्बिँदै गएको अवस्थामा रूस र होली सीबीच कायम रहेको प्रत्यक्ष संवादलाई विशेष गरी मानवीय विषयमा सम्पर्कको महत्वपूर्ण माध्यमका रूपमा हेरिएको छ।
