जिलोङ सीमा नाकामा ठूलो स्तरको उद्धार अभियान, सिचाङले उच्चतम विपद प्रतिकार्य सक्रिय गर्यो
ड्रागन मिडिया समाचार कक्ष
चीनको सिचाङ स्वायत्त क्षेत्रअन्तर्गत जिलोङ काउन्टीस्थित जिलोङ सीमा नाकामा आएको भीषण पहिरो तथा लेदोसहितको बाढीपछि ठूलो स्तरको उद्धार तथा राहत अभियान सञ्चालन भइरहेको छ। अगस्ट २७ मा उद्धार टोलीहरू प्रभावित क्षेत्रतर्फ तीव्र गतिमा परिचालन भइरहेका छन्।
बुधबार आएको विपदले चीन–नेपाल सीमाक्षेत्रमा ठूलो मानवीय क्षति पुर्याउनुका साथै जिलोङ नाकासम्म पुग्ने सडक, सञ्चार र विद्युत आपूर्तिसमेत अवरुद्ध बनाएको चिनियाँ अधिकारीहरूले जनाएका छन्। सिचाङ स्वायत्त क्षेत्रले प्राकृतिक विपद्का लागि आफ्नो उच्चतम स्तरको राहत तथा आपत्कालीन प्रतिकार्य सक्रिय गरेको छ।
सिचाङको आपत्कालीन व्यवस्थापन निकायले उद्धारका लागि ७९२ जना जनशक्ति र १५२ वटा सवारीसाधन परिचालन गरेको छ। क्षेत्रीय अग्नि तथा उद्धार निकायले थप ७२ वटा सवारीसाधन र ४३१ जना अग्नि तथा उद्धारकर्मी परिचालन गरेको छ। यी टोलीसँग प्रशिक्षित खोजी कुकुर, जीवित व्यक्तिको अवस्थिति पत्ता लगाउने उपकरण र तीव्र गतिका डुंगासमेत पठाइएको छ।
जनमुक्ति सेना र चिनियाँ सशस्त्र प्रहरी बलका अधिकारी तथा जवान पनि उद्धार अभियानमा परिचालित भएका छन्। ल्हासाबाट जिलोङतर्फ ठूलो संख्यामा उद्धार सवारीसाधन अघि बढिरहेको सिन्ह्वाका प्रतिनिधिहरूले जनाएका छन्।
अगस्ट २७ साँझ ५ः३५ बजेसम्म केन्द्र तथा क्षेत्रीय अधिकारीहरूले प्रभावित क्षेत्रमा ठूलो मात्रामा राहत सामग्री पठाएका छन्। ती सामग्रीमा ८ हजार बाक्ला कपडा, २ हजार पाल, ३ हजार सिरक र ५ हजार चिस्यान प्रतिरोधी म्याट समावेश छन्। यस्ता सामग्री विस्थापित नागरिकको अस्थायी बसोबास तथा तत्काल राहतका लागि प्रयोग गरिनेछ।
राष्ट्रिय स्तरमा चीनको प्राकृतिक श्रोत मन्त्रालयले भूगर्भीय विपद्का लागि दोस्रो तहको आपत्कालीन प्रतिकार्य सक्रिय गरेको छ, जुन चीनको चार तहको आपत्कालीन प्रणालीमा दोस्रो उच्च स्तर हो। मन्त्रालयले उद्धार अभियानलाई मार्गदर्शन गर्न र दोस्रो चरणका पहिरो तथा अन्य जोखिम रोक्न विशेषज्ञ टोली घटनास्थलतर्फ पठाएको छ।
राष्ट्रिय विपद् रोकथाम, न्यूनीकरण तथा राहत आयोग र आपत्कालीन व्यवस्थापन मन्त्रालयले केन्द्रबाट थप ३० हजार राहत सामग्री उपलब्ध गराएका छन्। ती सामग्रीमा पाल, ताप उपकरण, कपडा, सिरक, फोल्डिङ खाट र चिस्यान प्रतिरोधी म्याटलगायत छन्। राहत सामग्री विस्थापित नागरिकको स्थानान्तरण, पुनःबसोबास र आपत्कालीन सहयोगमा प्रयोग गरिनेछ।
चीनको अर्थ मन्त्रालय र आपत्कालीन व्यवस्थापन मन्त्रालयले सिचाङमा आपत्कालीन उद्धार तथा विपद् राहतका लागि १२ करोड युआन केन्द्रिय प्राकृतिक विपद् राहत कोषबाट विनियोजन गरेका छन्। यो रकम करिब १ करोड ७६ लाख ९० हजार अमेरिकी डलर बराबर हुन्छ।
यसैगरी राष्ट्रिय विकास तथा सुधार आयोगले विपद्पछिको आपत्कालीन पुनःस्थापना र पुनर्निर्माणका लागि केन्द्रिय बजेटबाट थप १० करोड युआन छुट्याएको छ। यससँगै प्रारम्भिक चरणमै केन्द्र सरकारबाट ठूलो वित्तीय तथा भौतिक सहायता परिचालन गरिएको छ।
राज्य स्वामित्वको इञ्जिनियरिङ तथा उद्धार कम्पनी चाइना अनेङले पहिलो चरणमा २०० जना विशेषज्ञ उद्धारकर्मी प्रभावित क्षेत्रमा पठाएको छ। उनीहरूसँग बहुउद्देश्यीय ड्रोन, त्रिआयामिक लेजर स्क्यानर र जीवन पहिचान उपकरणलगायत अत्याधुनिक प्रविधि पठाइएको छ।
जिलोङ नाकासम्मका सडक अवरुद्ध हुनुका साथै सञ्चार र विद्युतसमेत काटिएपछि उद्धार कार्य कठिन बनेको छ। विद्युत प्रणाली पुनःस्थापनाका लागि पहिलो चरणको मर्मत टोली घटनास्थलमा पुगिसकेको अधिकारीहरूले बताएका छन्।
नेपालसँग जोडिएको जिलोङ नाका चीन–नेपाल व्यापार र आवागमनका लागि महत्वपूर्ण स्थलमार्ग हो। उच्च हिमाली भूगोल, पहिरोको जोखिम र सीमित सडक पहुँचका कारण उद्धार अभियानमा हवाई, सैन्य, इञ्जिनियरिङ तथा प्राविधिक साधनको एकीकृत प्रयोग भइरहेको छ।
चिनियाँ अधिकारीहरूले अहिले खोज तथा उद्धार, विस्थापितको पुनःस्थापना, सडक तथा विद्युत पुनःसञ्चालन र दोस्रो चरणका सम्भावित प्राकृतिक जोखिमको नियन्त्रणलाई एकसाथ प्राथमिकतामा राखेका छन्।
