जिलोङ पहिरो प्रभावित क्षेत्रमा १०५ उद्धारकर्मी र १८ हजार ७३९ किलो राहत सामग्री पठाइयो
ड्रागन मिडिया समाचार कक्ष
चीनको सिचाङ स्वायत्त क्षेत्रस्थित जिलोङ नाकामा बुधबार आएको पहिरो तथा लेदो बहावपछि जारी उद्धार कार्यलाई सघाउन छेङ्दुबाट तीनवटा विशेष उडानमार्फत १०५ उद्धारकर्मी र १८ हजार ७३९ किलोग्राम राहत सामग्री ल्हासा पुर्याइएको छ।
अगस्ट २७ को बिहान छेङ्दुबाट उडेका तीनवटै विमान ल्हासा पुगेका हुन्। ती उडानमार्फत उद्धारकर्मीका साथै प्रभावित क्षेत्रमा तत्काल आवश्यक खाद्यान्न, लत्ताकपडा, सिरक, स्ट्रेचर, खोज तथा पहिचान उपकरण र काट्ने औजारलगायत सामग्री पठाइएको छ।
उद्धार तथा राहत सामग्रीको हवाई ढुवानी निःशुल्क गरिएको जनाइएको छ। ल्हासा पुगेका उद्धारकर्मी तथा सामग्रीलाई आवश्यक समन्वयपछि जिलोङ र आसपासका प्रभावित क्षेत्रमा परिचालन गरिनेछ।
जिलोङ नाकामा आएको पहिरो र लेदो बहावले सडक, सञ्चार तथा अन्य पूर्वाधारमा ठूलो क्षति पुर्याएपछि चीनले खोज, उद्धार, घाइतेको उपचार र राहत वितरणका लागि विभिन्न स्थानबाट थप जनशक्ति तथा उपकरण परिचालन गरिरहेको छ।
प्रभावित क्षेत्रमा दोस्रो चरणको पहिरो, नदी अवरोध र अस्थायी तालबाट उत्पन्न हुन सक्ने थप जोखिमसमेत रहेकाले उद्धार कार्यसँगै भूगर्भीय तथा जलसम्बन्धी अवस्थाको निरन्तर अनुगमन भइरहेको छ।
