जिलोङ विपद प्रभावित क्षेत्रमा पहिलो चरणमा १४१ उद्धारकर्मी पुगे, उच्च भूभागका लागि विशेष हेलिकोप्टर पनि परिचालन
ड्रागन मिडिया समाचार कक्ष
चीनको सिचाङ स्वायत्त क्षेत्रस्थित जिलोङ नाका आसपासको विपद प्रभावित क्षेत्रमा पहिलो चरणमा १४१ जना उद्धारकर्मी पुगेका छन्। चीनको आपत्कालीन व्यवस्थापन मन्त्रालयका अनुसार उनीहरू बिहीबार बिहान घटनास्थलमा पुगेका हुन्।
नेपाल–चीन सीमाक्षेत्रमा ठूलो मानवीय तथा भौतिक क्षति पुर्याएको पहिरो र लेदो बहावपछि चीनले खोज, उद्धार तथा आपत्कालीन सहायता कार्य तीव्र बनाएको छ।
उच्च हिमाली भूभागमा उद्धार तथा सामग्री ढुवानी सहज बनाउन विशेष उच्च भूभागमा सञ्चालन गर्न सक्ने हेलिकोप्टरसमेत प्रभावित क्षेत्रमा पुर्याइएको मन्त्रालयले जनाएको छ।
उद्धार टोलीले प्रभावित बस्ती, जिलोङ नाका आसपास तथा पहुँच कठिन भएका क्षेत्रमा खोज तथा उद्धारलाई प्राथमिकता दिएको छ। विभिन्न स्थानमा प्राविधिक उपकरण र ड्रोन प्रयोग गरी भूभागको अवलोकन तथा सम्भावित जोखिमको मूल्याङ्कन पनि भइरहेको छ।
यसअघि छेङ्दुबाट उद्धारकर्मी तथा राहत सामग्री बोकेका विशेष उडानहरू ल्हासा पुगेका थिए। चीनले प्रभावित क्षेत्रमा थप जनशक्ति, खाद्यान्न, लत्ताकपडा, स्वास्थ्य तथा खोज उपकरण परिचालन गर्दै उद्धार क्षमता विस्तार गरिरहेको छ।
जिलोङ क्षेत्रमा नदी अवरुद्ध भएर अस्थायी तालसमेत बनेकाले उद्धार कार्यसँगै दोस्रो चरणको पहिरो, अचानक पानीको बहाव तथा प्राकृतिक बाँध फुट्न सक्ने जोखिमको निरन्तर निगरानी भइरहेको छ।
