ओपेकबाट बाहिरिने सम्भावनाबारे भेनेजुएलामा गम्भीर छलफल
ड्रागन मिडिया समाचार कक्ष
भेनेजुएलाले तेल निर्यातकर्ता राष्ट्रहरूको संगठन ओपेकबाट बाहिरिने सम्भावनाबारे गम्भीर रूपमा विचार गरिरहेको ब्लुमबर्गले श्रोतलाई उद्धृत गर्दै जनाएको छ।
समाचारअनुसार काराकासले यस विषयमा अमेरिकी अधिकारीहरूसँग समेत छलफल गरेको छ। यद्यपि ओपेक सदस्यता त्याग्नेबारे भेनेजुएलाले अहिलेसम्म अन्तिम निर्णय गरिसकेको छैन।
भेनेजुएला विश्वको सबैभन्दा ठूलो प्रमाणित कच्चा तेल भण्डार भएका मुलुकमध्ये एक हो र लामो समयदेखि ओपेकको सदस्य रहँदै आएको छ। त्यसैले उसले संगठनबाट बाहिरिने निर्णय गरे विश्व तेल बजार तथा ओपेकको आन्तरिक शक्ति सन्तुलनमा समेत प्रभाव पर्न सक्ने देखिन्छ।
सम्भावित बहिर्गमनले भेनेजुएलाको तेल उद्योगमा अमेरिका तथा अन्य मुलुकका अन्तर्राष्ट्रिय ऊर्जा कम्पनीहरूको व्यापक उपस्थितिका लागि बाटो खुल्न सक्ने आकलन गरिएको छ।
भेनेजुएलाको तेल क्षेत्र लामो समयदेखि अमेरिकी प्रतिबन्ध, लगानी अभाव, प्राविधिक समस्या र उत्पादन क्षमतामा आएको गिरावटबाट प्रभावित हुँदै आएको छ। पछिल्लो छलफललाई काराकासले आफ्नो तेल उद्योगमा नयाँ लगानी भित्र्याउने र उत्पादन विस्तार गर्ने सम्भावित रणनीतिक विकल्पका रूपमा हेरिरहेको बुझिएको छ।
तर ओपेकबाट बाहिरिने निर्णय राजनीतिक, आर्थिक तथा ऊर्जा कूटनीतिका दृष्टिले महत्वपूर्ण हुने भएकाले काराकासले यसको सम्भावित प्रभावबारे थप मूल्याङ्कन गरिरहेको जनाइएको छ।
