चीनको डेटा उद्योग ६.७८ ट्रिलियन युआन पुग्यो, कृत्रिम बुद्धिमत्तालाई तीव्र गति
ड्रागन मिडिया समाचार कक्ष
चीनको डेटा उद्योग सन् २०२५ मा तीव्र विस्तार हुँदै ६.७८ ट्रिलियन युआन अर्थात करिब १ ट्रिलियन अमेरिकी डलर पुगेको छ। यो अघिल्लो वर्षको तुलनामा १५.७ प्रतिशत वृद्धि हो।
शुक्रबार शुरु भएको सन् २०२६ चीन अन्तर्राष्ट्रिय बिग डेटा उद्योग प्रदर्शनीमा सार्वजनिक आधिकारिक तथ्याङ्कअनुसार कृत्रिम बुद्धिमत्ता अनुप्रयोग सफ्टवेयरलगायत डेटा सम्बन्धी सफ्टवेयर उत्पादन र टोकन सेवासहित डेटा स्रोत उत्पादनको संयुक्त उत्पादन मूल्य ४.९९ ट्रिलियन युआन पुगेको छ। यो समग्र डेटा उद्योगको ७३.६ प्रतिशत हो।
यसै महिनासम्म चीनभर १ लाख २६ हजारभन्दा बढी उच्च गुणस्तरीय डेटा सेट निर्माण भइसकेका छन्। तिनको कुल परिमाण १,८१५ पेटाबाइट नाघेको छ, जुन मार्चको तुलनामा ८९ प्रतिशतभन्दा बढी वृद्धि हो।
चीनको राष्ट्रिय डेटा ब्युरोका प्रमुख लिउ लिहोङले कृत्रिम बुद्धिमत्ताको विकास डेटा स्रोतमा अत्यधिक निर्भर रहेको बताए। उनका अनुसार कृत्रिम बुद्धिमत्ता जहाँ अघि बढ्छ, त्यहीअनुसार चीनले उच्च गुणस्तरीय डेटा सेटको निर्माण र प्रयोगलाई विस्तार गर्दै आएको छ।
प्रदर्शनी दक्षिण पश्चिम चीनको कुइचोउ प्रान्तको राजधानी कुइयाङमा आयोजना भइरहेको छ। कुइचोउ चीनको राष्ट्रिय ‘पूर्वको डेटा, पश्चिमको कम्प्युटिङ’ परियोजनाको प्रमुख केन्द्र हो।
यस रणनीतिअन्तर्गत आर्थिक गतिविधि बढी रहेको पूर्वी क्षेत्रको ठूलो डेटा प्रशोधन भारलाई स्रोतसाधन सम्पन्न पश्चिमी क्षेत्रमा सारिन्छ। पश्चिमी क्षेत्रमा उपलब्ध जलविद्युत र वायु ऊर्जाजस्ता हरित ऊर्जाको उपयोग हुने भएकाले परियोजनालाई हरित प्रविधि र कार्बन उत्सर्जन न्यूनीकरणका दृष्टिले पनि महत्त्वपूर्ण मानिएको छ।
सन् २०२६ जुलाई अन्त्यसम्म कुइचोउमा ५० प्रमुख डेटा केन्द्र सञ्चालनमा थिए र तिनको कुल कम्प्युटिङ क्षमता १७६.५७ एक्साफ्लप्स पुगेको थियो। त्यसको ९८.४ प्रतिशत क्षमता कृत्रिम बुद्धिमत्तासम्बन्धी कम्प्युटिङमा समर्पित थियो।
एक एक्साफ्लप्सले प्रति सेकेन्ड एक क्विन्टिलियन फ्लोटिङ पोइन्ट गणना गर्ने कम्प्युटिङ क्षमतालाई जनाउँछ।
‘टोकन : डेटा तत्वको मूल्य सिर्जनाको नयाँ मार्ग’ विषयमा आयोजित प्रदर्शनीमा चीन तथा विदेशका ३७२ कम्पनी र १६ हजारभन्दा बढी दर्ता सहभागी रहेका छन्।
चीनले सन् २०१९ मा डेटालाई औपचारिक रूपमा उत्पादनको एउटा कारकका रूपमा मान्यता दिएको थियो। त्यसपछि सन् २०२३ मा राष्ट्रिय डेटा ब्युरो स्थापना गरिएको थियो। चीनको पछिल्लो डेटा उद्योग विस्तारलाई यी दीर्घकालीन नीतिगत प्रयासको परिणामका रूपमा हेरिएको छ।
