उद्धार उपकरण अभावमा कोरियाली टोली धुन्चे फर्कियो
ड्रागन मिडिया सम्वाददाता
भोटेकोशी बाढीपछि माथिल्लो त्रिशूली आयोजनाको सुरुङमा फसेकाहरूको उद्धारमा सहयोग गर्न घटनास्थल पुगेको दक्षिण कोरियाली उद्धार टोली आवश्यक उपकरण उपलब्ध नभएपछि काम सुरु गर्न नसकी धुन्चे फर्किएको छ।
उद्धारका लागि विशेषगरी मिनी स्काभेटर र हिलो तथा पानी निकाल्न प्रयोग हुने मड पम्प आवश्यक रहेकोमा ती उपकरण घटनास्थलमा उपलब्ध नभएपछि टोली तत्काल उद्धार कार्यमा खटिन नसकेको हो।
कोरियाली टोली आवश्यक प्राविधिक उपकरणसहित प्रभावित क्षेत्रमा पुगेर सुरुङभित्र फसेकाहरूको खोज तथा उद्धारमा सहयोग गर्ने तयारीमा थियो। तर घटनास्थलको अवस्था निरीक्षण गरेपछि आवश्यक उपकरणबिना सुरक्षित र प्रभावकारी रूपमा काम अघि बढाउन सम्भव नदेखिएकाले टोली धुन्चे फर्किएको जनाइएको छ।
आवश्यक मिनी स्काभेटर, मड पम्प तथा अन्य प्राविधिक सामग्री उपलब्ध भएपछि टोली पुनः घटनास्थलमा पुगेर उद्धार कार्यमा सहभागी हुने तयारी छ।
भोटेकोशी बाढीपछि प्रभावित जलविद्युत आयोजनाका सुरुङमा पानी, हिलो, ढुंगा तथा भग्नावशेष जम्मा भएकाले उद्धार कार्य अत्यन्त जटिल बनेको छ। सुरुङसम्म सुरक्षित पहुँच निर्माण गर्न तथा भित्र जमेको पानी र हिलो हटाउन विशेष उपकरणको आवश्यकता देखिएको छ।
यसअघि पनि उद्धारमा खटिएका प्राविधिकहरूले पर्याप्त स्काभेटर, पम्प, जेनेरेटर तथा अन्य उपकरण समयमै उपलब्ध हुन नसक्दा सुरुङ उद्धार प्रभावित भइरहेको बताएका थिए। पछिल्लो घटनाले अन्तर्राष्ट्रिय विशेषज्ञ टोली परिचालन गरे पनि उनीहरूलाई आवश्यक उपकरण र प्राविधिक पूर्वाधार तत्काल उपलब्ध गराउनु उत्तिकै महत्वपूर्ण रहेको देखाएको छ।
