रुस युद्ध रोक्न होइन, अन्त्य गरी दीर्घकालीन शान्ति चाहन्छ : पुटिन
ड्रागन मिडिया समाचार कक्ष
रुसी राष्ट्रपति भ्लादिमिर पुटिनले रुस युक्रेन युद्धलाई केवल स्थिर अवस्थामा रोक्न नभई पूर्ण रूपमा अन्त्य गरेर युक्रेन र युरोपमा दीर्घकालीन शान्ति स्थापना गर्न चाहेको बताएका छन्।
कजाकिस्तानका राष्ट्रपति कासिम जोमार्ट तोकायेभले गत जुलाईमा युक्रेन द्वन्द्वलाई तत्कालीन अवस्थामा स्थिर गर्ने प्रस्तावबारे सोधिएको प्रश्नमा पुटिनले रुस पनि शान्ति चाहने तर युद्धलाई केवल स्थगित गर्ने पक्षमा नरहेको बताए।
“हामी युद्धलाई स्थिर अवस्थामा रोक्न चाहँदैनौँ। हामी युद्ध अन्त्य गर्न र युक्रेन तथा युरोपमा दीर्घकालीन र पूर्ण शान्ति हासिल गर्न चाहन्छौँ,” पुटिनले भने।
उनले वार्तामा इच्छुक सबै पक्षसँग रुस वार्ता प्रक्रियामा सहभागी हुन तयार रहेको पनि बताए।
युक्रेनी सेनाका लागि बेलायतमा सञ्चालन हुन सक्ने हतियार उत्पादन केन्द्र रुसी सेनाको निशाना बन्न सक्छन् कि सक्दैनन् भन्ने प्रश्नमा भने पुटिनले यसलाई “सैन्य गोप्य विषय” भन्दै प्रत्यक्ष उत्तर दिएनन्।
