इजिप्टको दक्षिण सिनाई बस दुर्घटनामा मृतक संख्या २२ पुग्यो, २८ घाइते
ड्रागन मिडिया समाचार कक्ष
इजिप्टको दक्षिण सिनाई प्रान्तमा बुधबार भएको बस दुर्घटनामा मृत्यु हुनेको संख्या बढेर २२ पुगेको छ। दुर्घटनामा अन्य २८ जना घाइते भएका छन्।
इजिप्टको स्वास्थ्य तथा जनसङ्ख्या मन्त्रालयका अनुसार घाइतेहरूलाई उपचारका लागि नजिकका तीन अस्पतालमा भर्ना गरिएको छ। दक्षिण सिनाईको पूर्वी तटीय क्षेत्रमा रहेका पर्यटकीय शहर दाहाब र नुवैबाबीचको सडकमा बस पल्टिएको हो।
दुर्घटनापछि उद्धार तथा उपचारका लागि २० वटा एम्बुलेन्स घटनास्थलमा परिचालन गरिएको थियो।
स्थानीय सञ्चारमाध्यमले प्रारम्भिक अनुसन्धानलाई उद्धृत गर्दै बस अत्यधिक गतिमा रहेको र चालकले नियन्त्रण गुमाएपछि दुर्घटना भएको जनाएका छन्।
स्वास्थ्य तथा जनसङ्ख्यामन्त्री खालिद अब्देल गफ्फारले स्वास्थ्य निकायलाई उच्च सतर्कतामा राख्दै घाइतेलाई आवश्यक सबै आकस्मिक तथा चिकित्सकीय सेवा उपलब्ध गराउन निर्देशन दिएका छन्।
मन्त्रालयका अनुसार चिकित्सकीय टोली पूर्ण क्षमतामा परिचालित छन् र घाइतेको अवस्था तथा उपचार प्रक्रियाको निरन्तर अनुगमन भइरहेको छ।
