६० किलो गाँजा बरामद भ्यानको अस्पतालको स्टिकर हटाइएपछि प्रहरीमाथि प्रश्न, इन्स्पेक्टरसँग स्पष्टीकरण
ड्रागन मिडिया सम्वाददाता
विराटनगरमा अस्पतालको नाम उल्लेख भएको भ्यानबाट ६० किलो गाँजा बरामद भएपछि प्रहरी नियन्त्रणमा रहेको गाडीको स्टिकर हटाइएको र पछि फरक स्थानमा पुनः टाँसिएको विषयले विवाद उत्पन्न गरेको छ। घटनापछि इलाका प्रहरी कार्यालय रानीका प्रमुख प्रहरी निरीक्षक प्रवीण घिमिरेसँग २४ घण्टे लिखित स्पष्टीकरण मागिएको छ।
सशस्त्र प्रहरी बल मोरङको टोलीले मंगलबार राति विराटनगरको दरैयाबस्तीबाट ‘दिव्य ज्योति अस्पताल प्रा.लि.’ को स्टिकर टाँसिएको को १ च ६६२० नम्बरको भ्यानबाट ६० किलो गाँजा बरामद गरेको थियो। चालक भने गाडी छाडेर फरार भएका थिए।
सशस्त्र प्रहरीले आवश्यक कानुनी मुचुल्कासहित गाडी र गाँजा इलाका प्रहरी कार्यालय रानीलाई बुझाएको थियो। गाडी बुझाउँदाको अवस्थामा पछाडिको सिसाको तल्लो भागमा अस्पतालको पहिचान खुल्ने स्टिकर रहेको बताइएको छ। तर प्रहरी नियन्त्रणमा पुगेपछि उक्त स्टिकर हटाइएको विषय सार्वजनिक भएपछि प्रमाण संरक्षण र प्रहरीको भूमिकामाथि प्रश्न उठेको हो।
पछि सोही गाडीमा अस्पतालको स्टिकर पुनः टाँसिएको तर पहिलेको स्थानभन्दा फरक ठाउँमा रहेको देखिएपछि विवाद थप चर्किएको छ। स्टिकर कसले, किन र कुन परिस्थितिमा हटायो तथा पुनः कसले टाँस्यो भन्ने विषय अनुसन्धानको केन्द्रमा परेको छ। यद्यपि, यसलाई प्रहरीको आपराधिक संलग्नताको प्रमाणका रूपमा अहिल्यै निष्कर्ष निकालिएको छैन।
जिल्ला प्रहरी कार्यालय मोरङले घटनालाई गम्भीर रूपमा लिँदै थप अनुसन्धान भइरहेको जनाएको छ। मोरङ प्रहरी प्रमुख प्रहरी उपरीक्षक कवित कटवालले घटनासँग सम्बन्धित तथ्य बुझ्ने र जिम्मेवारी निर्धारण गर्ने प्रक्रिया अघि बढाइएको बताएकी छन्।
अर्कोतर्फ, दिव्य ज्योति आँखा अस्पतालले गाँजा बरामद भएको भ्यान आफ्नो स्वामित्वको नभएको दाबी गरेको छ। अस्पतालका सञ्चालक देवा यादवले पत्रकार सम्मेलनमार्फत विगतमा प्रचारप्रसारका क्रममा उक्त गाडीमा अस्पतालको स्टिकर टाँसिएको हुन सक्ने तर हाल गाडीसँग अस्पतालको कुनै सम्बन्ध नरहेको बताएका छन्।
प्रहरीले फरार चालकको खोजी जारी राखेको छ। अब अनुसन्धानले गाडीको वास्तविक स्वामित्व, अस्पतालको नाम कसरी प्रयोग भयो, गाँजा कहाँबाट ल्याइएको थियो र प्रहरी नियन्त्रणमा पुगेपछि स्टिकर किन हटाइयो तथा पुनः टाँसियो भन्ने प्रश्नको स्पष्ट उत्तर दिनुपर्ने देखिएको छ।
