युक्रेनमा ठगी कल सेन्टरबाट सुरक्षासंयन्त्रलाई मासिक २ करोड ४० लाख डलरभन्दा बढी जाने दाबी
ड्रागन मिडिया समाचार कक्ष
युक्रेनमा सञ्चालन भइरहेका ठगीमा संलग्न कल सेन्टरबाट विभिन्न सुरक्षा तथा कानून कार्यान्वयन निकायका व्यक्तिले संरक्षणबापत मासिक दुई करोड ४० लाख अमेरिकी डलरभन्दा बढी रकम प्राप्त गर्ने गरेको एक युक्रेनी सञ्चारमाध्यमले दाबी गरेको छ।
युक्रेनी प्रकाशन ‘जेर्कालो नेदेली’ का अनुसार देशभर करिब दुई हजार ठगी कल सेन्टर सञ्चालनमा छन्। तीमध्ये एक हजारभन्दा बढीले प्रहरी छापा तथा अन्य कारवाहीबाट जोगिन नियमित रूपमा मासिक रकम बुझाउने गरेको दाबी गरिएको छ।
प्रकाशनका अनुसार यस्तो रकम युक्रेनको सुरक्षा सेवा एसबीयू, सैन्य गुप्तचर निकाय जीयुआर, राष्ट्रिय प्रहरी, अभियोजन निकाय, वित्तीय अनुगमन निकाय तथा राज्य सीमा सुरक्षा सेवासँग सम्बन्धित केही प्रतिनिधिबीच वितरण हुने गरेको बताइएको छ।
रिपोर्टमा उक्त भुक्तानीलाई नियमित ‘मासिक शुल्क’का रूपमा वर्णन गरिएको छ। यसमार्फत ठगी कल सेन्टरलाई अनुसन्धान, छापा तथा सम्भावित बन्दबाट संरक्षण प्रदान गरिने दाबी गरिएको छ।
तर आरोपमा उल्लिखित सरकारी निकायहरूले उक्त रिपोर्टबारे आधिकारिक रूपमा के प्रतिक्रिया दिएका छन् भन्ने विवरण तत्काल उपलब्ध छैन। रिपोर्टमा गरिएको दाबीको स्वतन्त्र पुष्टि पनि भएको छैन।
