चीनमा घाँसेमैदान पशुपालनको आधुनिकीकरणका लागि राष्ट्रियस्तरको प्रशिक्षण
ड्रागन मिडिया समाचार कक्ष
चीनको कृषि तथा ग्रामीण मामिला मन्त्रालयअन्तर्गत पशुपालन ब्युरोको आयोजनामा घाँसेमैदानमा आधारित पशुपालनको रूपान्तरण र स्तरोन्नतिसम्बन्धी राष्ट्रियस्तरको प्रशिक्षण चीनको सिचुवान प्रान्तस्थित आबा तिब्बती तथा छ्याङ स्वायत्त प्रिफेक्चरको हुङयुआन काउन्टीमा सम्पन्न भएको छ।
सेप्टेम्बर १ देखि ३ सम्म आयोजित प्रशिक्षणमा भित्री मङ्गोलिया, शान्सी, च्याङ्सी, हुबेईलगायत १७ प्रान्त, स्वायत्त क्षेत्र तथा केन्द्रशासित शहर र सिनच्याङ उत्पादन तथा निर्माण कोर्प्सका कृषि, ग्रामीण मामिला, वन तथा घाँसेमैदानसम्बन्धी निकायका अधिकारी र पशुपालन प्राविधिक गरी १८० भन्दा बढी सहभागी भएका थिए।
सहभागीहरूले हुङयुआनको विशाल घाँसेमैदान क्षेत्रमा स्थलगत अध्ययन, विशेष प्रशिक्षण तथा अन्तरक्रिया गर्दै चीनको घाँसेमैदान पशुपालनलाई आधुनिक, प्रभावकारी र दिगो प्रणालीतर्फ रूपान्तरण गर्ने उपायबारे छलफल गरेका थिए।
कार्यक्रममा पशुपालन क्षेत्रको उच्च गुणस्तरीय विकाससँगै घाँसेमैदानको पारिस्थितिक संरक्षणलाई सन्तुलित रूपमा अघि बढाउने विषयमा विभिन्न क्षेत्रका अनुभव आदानप्रदान गरिएको थियो। पशुपालन उत्पादन बढाउँदा प्राकृतिक घाँसेमैदानको संरक्षणलाई समान महत्व दिनुपर्नेमा सहभागीहरूले जोड दिएका थिए।
मुख्यतः पशुपालनमै आधारित हुङयुआन काउन्टीले पछिल्ला वर्षमा पशुपालन क्षेत्रको आधुनिकीकरणका लागि पाँच प्रमुख क्षेत्रमा ध्यान केन्द्रित गर्दै आएको छ। त्यसअन्तर्गत मापदण्डअनुसार पशुपालन, ठूलो परिमाणमा पशुचारा उत्पादन, उद्यममुखी व्यवसाय सञ्चालन, व्यावसायिक सेवा विस्तार र डिजिटल व्यवस्थापनलाई प्राथमिकता दिइएको छ।
यी उपायमार्फत पशुपालनलाई हुङयुआनको समग्र आर्थिक विकासको प्रमुख आधार बनाउनुका साथै स्थानीय गोठाला समुदायको आम्दानी वृद्धि र जीवनस्तर सुधार गर्ने मुख्य उद्योगका रूपमा विकास गरिएको छ।
चीनले पछिल्ला वर्षमा पशुपालनको उत्पादन क्षमता बढाउने मात्र नभई घाँसेमैदान संरक्षण, वैज्ञानिक व्यवस्थापन, प्रविधिको प्रयोग र ग्रामीण आय वृद्धिलाई एउटै विकास ढाँचामा जोड्ने नीति अघि बढाइरहेको छ। हुङयुआनमा आयोजित प्रशिक्षणलाई विभिन्न पशुपालक क्षेत्रका सफल अभ्यासलाई राष्ट्रिय स्तरमा आदानप्रदान गर्ने र दिगो पशुपालन प्रणाली विस्तार गर्ने प्रयासका रूपमा हेरिएको छ।
