जियाङ्सीमा पहिरो र लेदोसहितको बाढी, ६ जनाको मृत्यु, ९ जना बेपत्ता
ड्रागन मिडिया समाचार कक्ष
चीनको पूर्वी जियाङ्सी प्रान्तस्थित सुइछुआन काउन्टीका विभिन्न क्षेत्रमा लगातारको भारी वर्षापछि आएको पहिरो र लेदोसहितको बाढीमा परी कम्तीमा ६ जनाको मृत्यु भएको छ भने नौ जना अझै बेपत्ता छन्।
स्थानीय अधिकारीहरूका अनुसार गाओपिङ टाउनसिपअन्तर्गत मिङखङ गाउँमा शनिबार आएको लेदोसहितको बाढी र पहिरोमा परी मंगलबार मध्याह्नसम्म पाँच जनाको मृत्यु पुष्टि भएको छ। सो घटनापछि सात जना अझै बेपत्ता रहेको जनाइएको छ।
यसैगरी, लगातारको मुसलधारे वर्षापछि सोही काउन्टीको जुओआन र थाङ्हु टाउनसिपमा पनि पहिरो गएको छ। ती घटनामा एक जनाको मृत्यु भएको पुष्टि भएको छ भने दुई जना बेपत्ता छन्।
यससँगै सुइछुआन काउन्टीमा पहिरो तथा लेदोसहितको बाढीबाट मृत्यु हुनेको कुल संख्या छ पुगेको छ भने बेपत्ता हुनेको संख्या नौ पुगेको छ।
विपद प्रभावित क्षेत्रमा खोज तथा उद्धार कार्य तीव्र रूपमा जारी राखिएको छ। स्थानीय प्रशासन तथा उद्धार टोलीहरू बेपत्ताको खोजीसँगै प्रभावित सडकको सुदृढीकरण, यातायात सम्पर्क पुनःस्थापना र थप पहिरो तथा अन्य दोस्रो चरणका विपद रोकथाममा केन्द्रित भएका छन्।
लगातारको वर्षाका कारण पहाडी भूभागमा थप पहिरोको जोखिम कायम रहन सक्ने भएकाले स्थानीय अधिकारीहरूले प्रभावित क्षेत्रको निगरानी र सुरक्षा व्यवस्थालाई उच्च प्राथमिकतामा राखेका छन्।
