हरित जीवनशैलीको उदाहरण बन्दै चीनको थ्येनचिन
ड्रागन मिडिया समाचार कक्ष
गर्मीबाट केही राहत खोज्दै दक्षिण अफ्रिकी नागरिक तुआने भान डर मर्वे आफ्ना आमाबाबुसँग उत्तरी चीनको थ्येनचिन नगरपालिका पुगिन्। तर उनीहरूको यात्राले केवल चिसो हावा र आराम मात्र दिएन। शहरका हरियाली क्षेत्र, पहाडी विश्रामस्थल, विद्युतीय सवारीसाधन र सहज सार्वजनिक यातायातले चीनमा हरित जीवनशैली दैनिक जीवनकै हिस्सा बन्दै गएको अनुभव गरायो।
तीन वर्षभन्दा बढी समयदेखि चीनमा अंग्रेजी शिक्षिकाका रूपमा कार्यरत भान डर मर्वे आफ्ना आमाबाबुलाई नियमित भ्रमणका क्रममा थ्येनचिन घुमाउँदै थिइन्। शहरका सडकछेउ साना उद्यान, आवासीय क्षेत्र हुँदै फैलिएका हरित मार्ग र सर्वसाधारणको पहुँचमा रहेका सार्वजनिक हरियाली क्षेत्रले उनलाई विशेष प्रभावित पारे।
“यहाँका शहरमा शहर र प्रकृतिलाई एउटै स्वरूपमा देख्न सकिन्छ,” उनले भनिन्, “यसले हावा सफा बनाउँछ र वातावरणलाई स्वस्थ राख्छ।”
परिवार उत्तरतर्फको चिचौ जिल्ला पुगेपछि हरियालीको अर्को स्वरूप देखियो। शहरका सडक क्रमशः वनले ढाकिएका पहाड र ग्रामीण अतिथि आवासमा परिणत भए। भान डर मर्वेका अनुसार शहरभित्र प्रकृतिलाई समावेश गर्नु जति महत्वपूर्ण छ, त्यति नै प्राकृतिक क्षेत्रको मौलिक स्वरूप संरक्षण गर्नु पनि आवश्यक छ।
“शहरका मानिस आएर आराम गर्न सक्ने केही प्राकृतिक स्थान सुरक्षित रहनैपर्छ,” उनले भनिन्।
आधिकारिक तथ्याङ्कअनुसार चीनका निर्मित शहरी क्षेत्रमा हरित आवरण ४३ प्रतिशतभन्दा माथि पुगेको छ। प्रतिव्यक्ति उद्यान तथा हरित क्षेत्र १५.९१ वर्गमिटर पुगेको छ। यस वर्षको पहिलो छ महिनामै २ हजार ८ सयभन्दा बढी साना उद्यान र २ हजार ४५० किलोमिटर शहरी हरित मार्ग निर्माण शुरु गरिएको छ। करिब ७ हजार ५ सय हेक्टर शहरी उद्यान तथा हरित क्षेत्रको पुनःनिर्माण वा स्तरोन्नति गरिएको छ।
भान डर मर्वेका लागि विशेष कुरा हरियाली उद्यान र पर्यटकीय क्षेत्रमा मात्र सीमित नभएको अनुभव थियो। उनी पुगेका धेरै स्थानमा प्रकृति वरपरको संरचना र दैनिक जीवनसँग जोडिएको देखिन्थ्यो।
“प्रकृति यसको ठूलो हिस्सा हो,” उनले भनिन्।
हरित वातावरणसँगै गर्मीयाममा सहज जीवनका लागि भरपर्दो विद्युत आपूर्ति पनि महत्वपूर्ण देखिएको छ। चिचौस्थित अतिथि आवासमा वातानुकूलन प्रणाली प्रयोग गर्दा कोठा छिट्टै चिसिएको अनुभव सुनाउँदै उनले चीनको गर्मी आफूहरूका लागि बढी भए पनि वातानुकूलन प्रणाली प्रभावकारी रहेको बताइन्।
यस प्रकारको दैनिक सुविधाको पछाडि नवीकरणीय ऊर्जालाई तीव्र रूपमा समेट्दै गएको चीनको विद्युत प्रणाली रहेको थ्येनचिन पावर एक्सचेन्ज सेन्टरका नयाँ ऊर्जा कारोबार व्यवस्थापनसम्बन्धी अधिकारी लिउ छाङले बताए।
उनका अनुसार विद्युत सञ्जाल प्रविधिमा सुधार र हरित विद्युत कारोबार विस्तारसँगै स्वच्छ ऊर्जाबाट उत्पादित विद्युतको मात्रा बढ्दै गएको छ र त्यसले घरपरिवार तथा व्यवसायको विद्युत आवश्यकता पूरा गर्न सहयोग गरिरहेको छ।
सन् २०२६ को जुलाई अन्त्यसम्म थ्येनचिनमा १५.७७ अर्ब किलोवाट घण्टा हरित विद्युत कारोबार भएको थियो। यो प्रत्यक्ष कारोबार गरिएको कुल विद्युतको ४१.४६ प्रतिशत हो।
चीनले विद्युत प्रणालीलाई अझ हरित बनाउँदै जीवाश्म इन्धनमाथिको निर्भरता घटाउने लक्ष्य लिएको छ। राष्ट्रिय विकास तथा सुधार आयोग र राष्ट्रिय ऊर्जा प्रशासनले जुलाईमा जारी गरेको सन् २०२६ देखि २०३० सम्मको योजनाअनुसार सन् २०३० सम्म चीनको कुल विद्युत उत्पादनमा गैरजीवाश्म ऊर्जाको हिस्सा ५० प्रतिशत पुर्याउने लक्ष्य छ। साथै विद्युत प्रणालीले २.८ अर्ब किलोवाटभन्दा बढी नयाँ ऊर्जा क्षमतालाई समेट्न सक्ने बनाउने योजना छ।
भान डर मर्वे परिवारले सडक यात्रामा पनि यही परिवर्तन अनुभव गर्यो। थ्येनचिनका सडकमा नयाँ ऊर्जा सवारीसाधन सामान्य दृश्य बनेका छन्। विद्युतीय बसहरू शान्त रूपमा यात्रु चढाउने र ओराल्ने गर्छन्। छोटो दूरीका लागि साझा साइकल उपलब्ध छन् भने सबवे, बस, अनलाइन सवारी सेवा र उच्चगतिका रेलले यात्राका विविध विकल्प दिएका छन्।
“आफ्नै गाडी हुनैपर्छ भन्ने छैन। एक ठाउँबाट अर्को ठाउँ पुग्न ठूलो रकम खर्च गर्न पनि पर्दैन,” भान डर मर्वेले भनिन्, “सडकबाट साइकल लिन सकिन्छ, बस चढ्न सकिन्छ, सबवे प्रयोग गर्न सकिन्छ वा डिडीमार्फत सवारी बोलाउन सकिन्छ।”
चीनको यातायात मन्त्रालयका अनुसार देशभर दैनिक २० करोडभन्दा बढी यात्रु यात्रा हरित यातायातका माध्यमबाट हुने गरेका छन्। यसमा करिब १० करोड यात्रा शहरी रेल सेवाबाट, अर्को करिब १० करोड बसबाट र २ करोड ४० लाख साझा साइकलमार्फत हुने गरेका छन्।
थ्येनचिन यात्राका क्रममा दक्षिण अफ्रिकी परिवारले देखेका धेरै हरित विकल्प कुनै विशेष प्रदर्शनका लागि तयार गरिएका थिएनन्। ती स्थानीय जनजीवनका सामान्य पक्ष बनिसकेका थिए। आवासीय क्षेत्रनजिक उद्यान छन्, सार्वजनिक यातायात सहज छ र भरपर्दो विद्युत प्रणालीले दैनिक जीवनलाई आरामदायी बनाइरहेको छ।
गर्मीबाट केही राहत खोज्दै थ्येनचिन पुगेको परिवारका लागि अन्ततः “चिसोपन” को अर्थ केवल पहाडबाट आउने हावा वा वातानुकूलनमा सीमित रहेन। उनीहरूको स्मृतिमा चीनको हरित शहर, स्वच्छ ऊर्जा, सहज यातायात र प्रकृतिसँग जोडिएको दैनिक जीवनसमेत बस्यो।
