शिक्षक दिवसका अवसरमा सी चिनफिङको शुभकामना, शिक्षा शक्तिशाली राष्ट्र निर्माणमा जोड
ड्रागन मिडिया समाचार कक्ष
चिनियाँ राष्ट्रपति सी चिनफिङले सेप्टेम्बर १० मा मनाइने शिक्षक दिवसका अवसरमा देशभरका शिक्षक तथा शिक्षा क्षेत्रमा कार्यरत व्यक्तिहरूलाई शुभकामना दिएका छन्।
चिनियाँ कम्युनिष्ट पार्टी केन्द्रीय समितिका महासचिव तथा केन्द्रीय सैन्य आयोगका अध्यक्षसमेत रहेका सीले शुभकामना सन्देशमार्फत शिक्षकहरूलाई आफ्नो पेशागत दक्षता र क्षमता थप सुदृढ गर्न आग्रह गरेका छन्।
उनले राष्ट्रिय पुनरुत्थानको ऐतिहासिक जिम्मेवारी वहन गर्न सक्ने नयाँ पुस्ता तयार गर्नु शिक्षा क्षेत्रको महत्त्वपूर्ण दायित्व भएको उल्लेख गरेका छन्।
सीले लामो समयदेखि चीनका शिक्षकहरूले शिक्षाप्रति समर्पित भएर ज्ञान प्रदान गर्दै युवा पुस्ताको विकासमा योगदान पुर्याएको बताए। उनले पार्टी र राज्यको विकासमा शिक्षकहरूले गरेको योगदानको उच्च प्रशंसा गरेका छन्।
राष्ट्रपति सीले नयाँ यात्रामा शिक्षामार्फत नैतिक चरित्र निर्माण गर्ने आधारभूत जिम्मेवारी प्रभावकारी रूपमा पूरा गर्नुपर्नेमा जोड दिए। उनले शिक्षकहरूमा उच्चस्तरीय पेशागत नैतिकता, जिम्मेवारी र आचरण विकास गर्नुपर्ने बताए।
उनले समाजमा शिक्षकप्रतिको सम्मान अझ बढाउन, शिक्षा क्षेत्रलाई व्यापक सहयोग उपलब्ध गराउन र चीनलाई शिक्षाको क्षेत्रमा अग्रणी राष्ट्र बनाउने उद्देश्यमा सबै पक्षको शक्ति एकीकृत गर्न आह्वान गरेका छन्।
चीनसँग विश्वकै सबैभन्दा ठूलो शिक्षा प्रणाली रहेको छ। देशभर विभिन्न तह र प्रकारका करिब चार लाख ४० हजार विद्यालय सञ्चालनमा छन्। ती विद्यालयमा करिब २८ करोड विद्यार्थी अध्ययनरत छन् भने शिक्षकको संख्या एक करोड ८७ लाख रहेको छ।
चीनले शिक्षा, विज्ञान, प्रविधि र प्रतिभा विकासलाई राष्ट्रिय आधुनिकीकरण तथा दीर्घकालीन विकासका प्रमुख आधारका रूपमा अघि बढाउँदै आएको छ। शिक्षक दिवसका अवसरमा राष्ट्रपति सीको सन्देशले शिक्षा प्रणालीको गुणस्तर सुधारसँगै शिक्षकको भूमिका, पेशागत क्षमता र सामाजिक प्रतिष्ठालाई थप सुदृढ गर्ने राज्यको प्राथमिकता पुनः स्पष्ट गरेको छ।
