रेलमार्ग र एउटा होटलले बदल्यो ३,१०० मिटर उचाइको हिमाली गाउँ

ड्रागन मिडिया समाचार कक्ष

समुन्द्र सतहबाट ४,३१८ मिटर उचाइमा रहेको ल्हारी ड्राकार हिमाल अग्लिएर उभिएको छ। वरिपरि हिमाच्छादित चुचुरा, अनेक जातका फूल फुलेका घाँसे मैदान तथा साना ठूला तालले यहाँको प्राकृतिक सौन्दर्यलाई विशिष्ट बनाएका छन्। यही प्राकृतिक परिवेशमा एउटा रेलमार्ग र एउटा होटलले सानो हिमाली गाउँमा अभूतपूर्व परिवर्तन र नयाँ जीवन्तता ल्याएको छ।

चार वर्षअघिसम्म ग्यात्सारो गाउँको सौन्दर्य स्थानीय बासिन्दाबाहेक धेरैलाई थाहा थिएन। समुन्द्र सतहबाट करिब ३,१०० मिटर उचाइमा रहेको यस गाउँमा ३२ घरधुरीका १४५ जना बसोबास गर्छन्। पुस्तौँदेखि यहाँका बासिन्दाले वरिपरिका घाँसे मैदान र वनजङ्गललाई आफ्नै आँखाको नानीझैँ संरक्षण गर्दै आएका छन्।

प्राकृतिक दृश्य अत्यन्त सुन्दर भए पनि विगतमा घुमाउरा र जोखिमपूर्ण सडकका कारण यहाँ पुग्न कठिन थियो। यातायातको असुविधाले गाउँको सौन्दर्य बाहिरी संसारबाट लगभग लुकेर बसेको थियो। द्रुतगतिको रेलमार्ग सञ्चालनमा आएपछि भने अवस्था बदलिएको छ। सिचुवान तथा अन्य शहरबाट आउने पर्यटकका लागि यस क्षेत्रमा पुग्न सहज भएको छ।

साताका कामकाजी दिनमा यहाँको यातायात सामान्य रहे पनि सप्ताहन्तमा पर्यटकको चहलपहल तीव्र हुन्छ। सडकमा सवारीसाधनको आवागमन बढ्छ र विभिन्न क्षेत्रबाट आएका पाहुनाले गाउँ भरिभराउ हुन्छ।

गाउँमा सञ्चालनमा आएको होटल केवल बसोबास गर्ने स्थानमा सीमित छैन। त्यहाँ स्थानीय परिवारले पुस्तौँदेखि संरक्षण गर्दै आएका पुराना घरेलु सामग्री र परम्परागत वस्तु प्रदर्शनमा राखिएका छन्। यसले पर्यटकलाई स्थानीय जीवनशैली, इतिहास र मौलिक संस्कृतिबारे नजिकबाट बुझ्ने अवसर प्रदान गरेको छ।

पर्यटकका लागि पदयात्रा, शिविर बस्ने, जङ्गली च्याउ सङ्कलन गर्ने तथा घोडचढी जस्ता गतिविधि पनि उपलब्ध छन्। यससँगै उच्च हिमाली क्षेत्रका विशेष उत्पादन तथा स्थानीय जातीय संस्कृतिसँग सम्बन्धित सामग्रीले पर्यटन अनुभवलाई थप समृद्ध बनाएका छन्।

रेल सम्पर्क विस्तार र स्थानीय पर्यटन पूर्वाधारको विकाससँगै पहिले दुर्गम र कम परिचित रहेको यो हिमाली गाउँ अहिले प्रकृति, संस्कृति र ग्रामीण जीवनको अनुभव लिन चाहने पर्यटकका लागि आकर्षक गन्तव्यका रूपमा विकसित हुँदै गएको छ।