ट्रम्पको प्रचारजस्ता विज्ञापनमा सरकारी रकम खर्च भएको भन्दै मुद्दा

ड्रागन मिडिया समाचार कक्ष

अमेरिकी डेमोक्र्याटिक पार्टी र कमन कजसहितका समूहले राष्ट्रपति डोनाल्ड ट्रम्पको समर्थनमा प्रचार गरिएको आरोप लागेका सरकारी विज्ञापन रोक्न माग गर्दै मुद्दा दायर गरेका छन्। उनीहरूले करदाताको रकम पार्टीगत प्रचारमा खर्च गर्नु गैरकानुनी सरकारी प्रचार हुन सक्ने दाबी गरेका छन्।

विज्ञापन निगरानी गर्ने एडइम्प्याक्टका अनुसार सेप्टेम्बरयता यस्ता विज्ञापनमा १ करोड २० लाख डलरभन्दा बढी खर्च भएको छ। गृह सुरक्षा मन्त्रालयले विज्ञापनका लागि २ करोड डलरको सम्झौता गरेको बताइएको छ। खर्चका लागि प्रयोग भएको रकम अध्यागमन कार्यान्वयनका लागि कांग्रेसले स्वीकृत गरेको १७ करोड ५० लाख डलरको बजेटबाट आएको दाबी मुद्दाकर्ताहरूको छ।

सरकारले भने विज्ञापनलाई जनहितसम्बन्धी सूचना भनेको छ। ट्रम्पले आगामी विज्ञापनको खर्च आफ्नो राजनीतिक समिति (सुपर पीएसी) ले बेहोर्ने बताएका छन्; तर मंगलबार प्रसारित विज्ञापन सरकारी रकमबाटै बनेको थियो कि थिएन र त्यसको रकम फिर्ता गरिन्छ कि गरिँदैन भन्नेबारे स्पष्टता छैन। मुद्दाको टुंगो लाग्न बाँकी छ।