चिकित्सा शिक्षामा ४१८ सिट थप, कुल संख्या ९ हजार ६९१
ड्रागन मिडिया सम्वाददाता
चालु शैक्षिक सत्र २०८३/८४ का लागि चिकित्सा शिक्षातर्फ ४१८ सिट थपिएका छन्। यससँगै चिकित्सा शिक्षाका कुल सिट ९ हजार ६९१ पुगेको शिक्षा मन्त्री सस्मित पोखरेलले जानकारी दिएका छन्।
थपिएका सिटमध्ये एमबीबीएसतर्फ ११०, बीएस्सी नर्सिङतर्फ २१० र बीएमएसतर्फ ९८ छन्। गेटास्थित सहिद दशरथ चन्द स्वास्थ्य विज्ञान विश्वविद्यालयमा ५० सिटसहित एमबीबीएस पढाइ शुरु हुने भएको छ। धरानस्थित बीपी कोइराला स्वास्थ्य विज्ञान प्रतिष्ठान र नेपाली सेना स्वास्थ्य विज्ञान प्रतिष्ठानमा एमबीबीएसका ३०–३० सिट थपिएका छन्।
मन्त्री पोखरेलका अनुसार थपिएका सबै सिट सरकारी शिक्षण संस्थालाई दिइएका छन्। निजी कलेजहरूको सिट संख्या भने यथावत राखिएको छ।
