रिहा भएपछि श्रेष्ठले भने—समाचारमा चित्त नबुझे प्रेस काउन्सिल जानुपर्छ
ड्रागन मिडिया सम्वाददाता
साइबर ब्युरोमा भएको छलफलपछि पत्रकार किशोर श्रेष्ठ शनिबार साँझ रिहा भएका छन्। कलाकार तथा राष्ट्रिय स्वतन्त्र पार्टीका नेता हिमेश पन्तको उजुरीपछि प्रहरीले श्रेष्ठलाई बिहान ललितपुरको नख्खुस्थित निवासबाट नियन्त्रणमा लिएर ब्युरो पुर्याएको थियो।
रातोपाटीका अनुसार रिहाइपछि सामाजिक सञ्जालमार्फत धारणा सार्वजनिक गर्दै श्रेष्ठले सञ्चारमाध्यममा प्रकाशित सामग्रीप्रति चित्त नबुझे प्रेस काउन्सिल नेपालमा उजुरी गर्नुपर्ने बताएका छन्। साइबर ब्युरो सञ्चारमाध्यमविरुद्धका मुद्दा टुङ्ग्याउने निकाय नभएको उनको भनाइ छ। सञ्चार सामग्री प्रकाशन गरेकै आधारमा पत्रकारलाई पक्राउ गर्न वा सञ्चार उपकरण जफत गर्न नपाइने सर्वोच्च अदालतको परमादेशले स्थापित गरेको मान्यता आज पनि लागू भएको उनले दाबी गरेका छन्।
जनआस्था अनलाइनमा पन्तबारे प्रकाशित समाचार र त्यसपछि सामाजिक सञ्जालमा भएका टिप्पणीलाई लिएर दुवै पक्षले साइबर ब्युरोमा उजुरी दिएका थिए। ब्युरोमा करिब तीन घण्टा छलफलपछि मिलापत्रको कागज गरेर श्रेष्ठलाई घर जान दिइएको नेपाल प्रेसले जनाएको छ।
देशसञ्चारका अनुसार छलफलमा श्रेष्ठ र पन्तले आगामी दिनमा सामाजिक सञ्जालमा एकअर्काविरुद्ध टिप्पणी नगर्ने र समाचारसम्बन्धी विवाद प्रेस काउन्सिलमार्फत अघि बढाउने सहमति गरेका छन्। रिहाइपछि श्रेष्ठले पन्तले आफूहरूमाथि सामाजिक सञ्जालमा व्यक्तिलक्षित टिप्पणी गरेको स्वीकार गरेको पनि जिकिर गरेका छन्।
