पोर्चुगलमा आवास र महँगीविरुद्ध दशौँ हजारको प्रदर्शन
ड्रागन मिडिया समाचार कक्ष
आवासको मूल्य घटाउन र बढ्दो जीवनयापन खर्च नियन्त्रण गर्न माग गर्दै शनिबार पोर्चुगलका लिस्बन, पोर्तो, कोइम्ब्रा लगायतका शहरमा दशौँ हजार मानिसले प्रदर्शन गरेका छन्।
लिस्बनको केन्द्रमा भेला भएका प्रदर्शनकारीले घरजग्गाको सट्टेबाजी बढाएको आरोप लगाउँदै ठूला लगानी कोषलाई रोक्ने कानुन बनाउन माग गरेका थिए। उनीहरूले आवास प्रदर्शनकारीमाथि प्रहरीले गरेको कारवाहीको विरोधमा पनि नाराबाजी गरे।
स्थानीय सञ्चारमाध्यमका अनुसार बिहीबार बिहान पोर्तोमा प्रदर्शनकारी हटाउन प्रहरीले गरेको कारवाहीमा ३७ जना घाइते भएका थिए। तीमध्ये दुई जनाको अवस्था गम्भीर रहेको बताइएको छ।
राष्ट्रपति एन्टोनियो जोसे सेगुरोले शनिबार गरिबीलाई लोकतान्त्रिक समाजमा अपरिहार्य मान्न नसकिने बताएका छन्। राष्ट्रपतिको कार्यालयको वेबसाइटमा प्रकाशित सन्देशमा उनले पोर्चुगलका करिब १६ लाख ६० हजार मानिस अझै गरिबीको जोखिममा रहेको उल्लेख गरे। सन् २०१५ पछि पहिलोपटक यस्तो जोखिममा रहेका मानिसको सङ्ख्या २० लाखभन्दा तल झरेको उनले बताए।
आधारभूत सेवामा पहुँच सुनिश्चित गर्न र जोखिममा रहेका समुदायको संरक्षण गर्न थप प्रयास आवश्यक रहेको राष्ट्रपतिको भनाइ छ। पोर्चुगलका प्रदर्शनहरू युरोपभर फैलिएको आवाससम्बन्धी अभियानको हिस्सा हुन्। स्पेन र फ्रान्समा पनि यस्तै प्रदर्शन भएका छन्।
