कोलकाताको दुर्गा पूजा पण्डालमा भागदौड, १९ जनाको मृत्यु
ड्रागन मिडिया समाचार कक्ष
भारतको कोलकातास्थित चोरबागानको दुर्गा पूजा पण्डालमा शनिबार साँझ भएको भागदौडमा १९ जनाको मृत्यु भएको छ भने २५ जना घाइते भएका छन्।
पश्चिम बंगालका मुख्यमन्त्री सुभेन्दु अधिकारीले आइतबार मृतक र घाइतेको संख्या पुष्टि गरेका हुन्। उनका अनुसार घाइतेमध्ये २४ जनाको अवस्था खतरामुक्त छ भने एक जनाको अवस्था गम्भीर छ।
अचानक वर्षा भएपछि ओत लाग्न खोज्ने श्रद्धालुको भीड पण्डालतर्फ बढ्दा भागदौड मच्चिएको प्रहरीको प्रारम्भिक भनाइ छ। घटनापछि प्रहरीले पण्डालका केही आयोजक, निजी सुरक्षा कर्मचारी र ड्युटीमा रहेका कर्मचारीलाई सोधपुछका लागि नियन्त्रणमा लिएको छ। भीड व्यवस्थापन र सुरक्षामा भएको सम्भावित कमजोरीबारे छानबिन भइरहेको छ।
मुख्यमन्त्री अधिकारीले घटनाको छानबिनका लागि उच्च अदालतका न्यायाधीशको नेतृत्वमा विशेष अनुसन्धान टोली गठन गर्ने बताएका छन्। राज्य सरकारले मृतकका परिवारलाई जनही २५ लाख रुपैयाँ र परिवारका एक सदस्यलाई रोजगारी दिने घोषणा गरेको छ। घाइतेको उपचार खर्च सरकारले व्यहोर्ने र उनीहरूलाई जनही पाँच लाख रुपैयाँ उपलब्ध गराउने पनि जनाएको छ।
