पीएचपीका गम्भीर सुरक्षा कमजोरीपछि नेपालसहित विभिन्न देशका वेबसाइट बन्द
ड्रागन मिडिया समाचार कक्ष
पीएचपी प्रोग्रामिङ भाषामा भेटिएका दुई गम्भीर सुरक्षा कमजोरीपछि नेपालसहित विभिन्न देशका सरकारी तथा सार्वजनिक वेबसाइट अस्थायी रूपमा बन्द गरिएका छन्। पीएचपी विकासकर्ताले बुधबार यी कमजोरी समाधान गर्ने सुरक्षा अद्यावधिक जारी गरेका छन्। कमजोरीको दुरुपयोग भएमा आक्रमणकारीले प्रभावित सर्भरमा दूरबाटै आफूले चाहेको कोड चलाउन सक्ने पीएचपीको आधिकारिक सूचनामा उल्लेख छ।
अद्यावधिक तत्काल लागू गर्न नसक्ने संस्थालाई वेबसाइट अस्थायी रूपमा बन्द गर्न साइबर सुरक्षा निकायहरूले सुझाव दिएका छन्। युरोपका केही सरकारी वेबसाइट तथा अन्य सार्वजनिक सेवाहरू सुरक्षा अद्यावधिक लागू गर्ने क्रममा अफलाइन भएका थिए।
देशसञ्चारको समाचारअनुसार, बिहीबार बिहान राष्ट्रपति कार्यालय, प्रधानमन्त्री कार्यालय, विभिन्न मन्त्रालय र स्थानीय तहका केही सरकारी वेबसाइट खुलेका थिएनन्। ती वेबसाइट सुरक्षा कमजोरीकै कारण बन्द गरिएका हुन् वा प्राविधिक अवरोधका कारण उपलब्ध नभएका हुन् भन्नेबारे नेपालका सम्बन्धित निकायको पुष्टि समाचारमा उल्लेख छैन।
पीएचपी विकासकर्ताले प्रभावित संस्करण चलाइरहेका प्रयोगकर्तालाई सुरक्षा अद्यावधिक तुरुन्त लागू गर्न आग्रह गरेका छन्।
