खेलले विश्वलाई जोड्ने आधार दिन्छ : पुटिन
ड्रागन मिडिया समाचार कक्ष
रुसी राष्ट्रपति भ्लादिमिर पुटिनले खेलले समानता, न्याय, पारस्परिक सम्मान र एकताको भावना प्रवर्द्धन गर्दै परिवर्तनका समयमा विश्वलाई जोड्ने आधार दिने बताएका छन्।
अक्टोबर २३ मा क्रास्नोयार्स्कमा आयोजित ‘रुस : खेलकुदको देश’ अन्तर्राष्ट्रिय खेलकुद मञ्चका सहभागी तथा अतिथिलाई दिएको सन्देशमा उनले खेलकुद अभ्यासले मानिसमा जिम्मेवारी र अनुशासन विकास गर्ने बताए। लक्ष्य प्राप्तिमा केन्द्रित हुन सक्ने यस्ता गुणले व्यक्तिगत जीवनदेखि देश र जनताको सेवासम्म सफलता हासिल गर्न सघाउने उनको भनाइ थियो।
यसै कारण मञ्चको कार्यसूचीमा बालबालिका तथा किशोरकिशोरीको खेलकुद र युवामाझ शारीरिक गतिविधि प्रवर्द्धनलाई महत्त्व दिइएको पुटिनले उल्लेख गरे। यस वर्षको मञ्चको मूल विषय ‘परिवर्तनका समयमा खेलकुद : विश्वलाई जोड्दै’ रहेको छ।
परिवर्तन र विकासका लागि बलियो आधार आवश्यक हुने भन्दै उनले खेलकुदले साझा मानवीय मूल्यलाई बलियो बनाउने बताए। रुस अन्तर्राष्ट्रिय खेलकुद समुदायको अभिन्न र महत्त्वपूर्ण सदस्य रहने तथा आफूले स्वीकार गरेका अन्तर्राष्ट्रिय दायित्व र उचित आवश्यकताको पालना गर्ने प्रतिबद्धता पनि उनले व्यक्त गरे।
रुस संवाद र सहकार्यका लागि खुला रहेको उल्लेख गर्दै पुटिनले खेलकुदका परम्परा र अन्तर्राष्ट्रिय खेलकुद कानुनका आधारभूत मान्यताको संरक्षण तथा विकासका पक्षमा रहेको बताए।
खेलकुदलाई सबैका लागि पहुँचयोग्य बनाउने, प्रशिक्षण र प्रतियोगितामा नवीन प्रविधि प्रयोग गर्ने तथा खेल चिकित्सा, खेलाडी प्रशिक्षण र शिक्षालाई अघि बढाउने विषयलाई उनले खेलकुदको भविष्यसँग जोडे। नयाँ खेल विधिको विकासलाई स्वागत गर्दै खेलले व्यक्तिको सर्वाङ्गीण विकास र स्वस्थ जीवनशैली प्रवर्द्धन गर्नुपर्नेमा उनले जोड दिए।
