पचास वर्षपछि सहपाठीलाई प्राध्यापक डा. लि सिक्वाङको भावुक पत्र
ड्रागन मिडिया समाचार कक्ष
प्राध्यापक डा. लि सिक्वाङले माध्यमिक तहका सहपाठीहरूको स्नातक भएको ५०औँ वर्षगाँठका अवसरमा सम्झनासहितको पत्र लेखेका छन्। हाल उरुम्चीमा रहेका उनले विद्यालयको पुनर्मिलन समारोहमा सहभागी हुन नसकेको भन्दै अक्टोबर २५ को बिहान विच्याटमा पत्र सार्वजनिक गरेका हुन्।
स्युचाउ माइनिङ मेसिनरी स्कुलको उच्च माध्यमिक तहको दोस्रो वर्षको चौथो कक्षाबाट स्नातक भएको ५० वर्ष पुगेको अवसरमा लेखिएको पत्रमा उनले सहपाठीसँगै पढेका, अध्ययनसँगै श्रम अभ्यास गरेका र राजनीतिक आन्दोलनका कठिन दिन भोगेका सम्झना अझै ताजा रहेको बताएका छन्।
उनले कक्षाका प्रत्येक साथी र शिक्षकलाई सम्झिएको उल्लेख गर्दै कक्षा शिक्षक तथा गणित पढाउने स्यु झेनह्वालाई विशेष रूपमा स्मरण गरेका छन्। सहपाठी ली केआन र चाउ बेइपिङसँग जीवनमै पहिलोपटक आमाबुवालाई थाहै नदिई मदिरा पिएको प्रसङ्ग पनि उनले पत्रमा उल्लेख गरेका छन्। विद्यालयका केही छात्राको सम्झना अझै मनमा रहेको उनले आत्मीय शैलीमा लेखेका छन्।
माध्यमिक शिक्षा पूरा गरेपछि उनले चिउलीसानस्थित कोइला खानीका लागि सामग्री उत्पादन गर्ने कारखानामा दुई वर्ष काम गरेका थिए। सन् १९७८ मा चीनमा राष्ट्रिय विश्वविद्यालय प्रवेश परीक्षा पुनः सुरु भएपछि उनी नान्जिङ विश्वविद्यालयमा भर्ना भएका थिए।
छिङह्वा विश्वविद्यालयबाट गत वर्ष अवकाशपछि आफू स्वेच्छाले सिन्च्याङ आएको र त्यहाँको एक विश्वविद्यालयमा अध्यापन तथा अनुसन्धानमा संलग्न रहेको उनले बताएका छन्। उनको अनुसन्धान चीनका सीमावर्ती क्षेत्रसँग सम्बन्धित छ।
लि सिक्वाङ सिन्च्याङ वित्त तथा अर्थशास्त्र विश्वविद्यालयका विशेष नियुक्त प्राध्यापक तथा छिङह्वा विश्वविद्यालयको पाकिस्तान संस्कृति तथा सञ्चार अध्ययन केन्द्रका निर्देशक हुन्। उनी चीनको परराष्ट्र मन्त्रालयको सार्वजनिक कूटनीति परामर्श समितिका सदस्य पनि छन्।
पुनर्मिलन समारोहमा सहभागी हुन नपाएकोमा दुःख व्यक्त गर्दै उनले सहपाठी र शिक्षकलाई सिन्च्याङ वा बेइजिङमा भेट्न निमन्त्रणा दिएका छन्। पत्रको अन्त्यमा उनले सबैको स्वास्थ्य, दीर्घायु र पारिवारिक सुखको कामना गर्दै आत्मीय अँगालो पठाएका छन्।
