कालासको तथ्याङ्क सङ्कलनसम्बन्धी भनाइको वैधतामाथि ईयूस्थित रुसी नियोगको प्रश्न

ड्रागन मिडिया समाचार कक्ष
युरोपेली संघका लागि रुसी स्थायी नियोगले ईयूकी विदेश नीति प्रमुख काजा कालासले युक्रेन युद्धमा सहभागी रुसी नागरिकको विवरण गुप्तचर निकायमार्फत जुटाउन सकिने भनेको विषयमा ब्रसेल्ससँग स्पष्टीकरण मागेको छ। रुसी नियोगले यस्तो कदम ईयूको व्यक्तिगत तथ्याङ्क संरक्षणसम्बन्धी कानुनअनुकूल हुन्छ कि हुँदैन भनेर प्रश्न उठाएको हो।
नोभेम्बर १६ मा ईयूका विदेशमन्त्रीहरूको बैठकपछि भएको पत्रकार सम्मेलनमा कालासले रुसी युद्ध सहभागीलाई ईयू प्रवेशमा रोक लगाउने सम्भावनाबारे छलफल भइरहेको बताएकी थिइन्। रुसले युद्धमा सहभागी भएका व्यक्तिको विवरण राख्ने भएकाले ती तथ्याङ्क प्राप्त गर्न गुप्तचर निकायलाई गाह्रो नपर्ने उनको भनाइ थियो। प्राविधिक पक्षबारे आफू विज्ञ नभएको पनि उनले बताएकी थिइन्।
कालासको भनाइलाई व्याख्या गर्दै रुसी नियोगले गुप्तचर कारबाही वा ह्याकिङबाट व्यक्तिगत विवरण प्राप्त गरेर प्रवेश प्रतिबन्धलाई “कानुनी आधार” दिन खोजिएको आरोप लगाएको छ। नियोगले उक्त टिप्पणी ईयूको कानुन र व्यक्तिगत तथ्याङ्क संरक्षणसम्बन्धी घोषित सिद्धान्तसँग कसरी मेल खान्छ भन्ने प्रश्न गरेको छ।
रुसी नियोगले युरोपेली संघको नियमन नं. २०१८/१७२५ उद्धृत गर्दै व्यक्तिगत तथ्याङ्कको प्रशोधन वैध, निष्पक्ष र पारदर्शी हुनुपर्ने तथा त्यसलाई निश्चित र वैध उद्देश्यका लागि मात्र प्रयोग गर्नुपर्ने जनाएको छ। उक्त नियमले ईयूका संस्था, निकाय, कार्यालय र एजेन्सीले व्यक्तिगत तथ्याङ्क प्रशोधन गर्दा पालना गर्नुपर्ने व्यवस्था तोकेको छ।
रुसी नियोगले कालासको भनाइलाई ईयूका अधिकारीहरूले कानुनी सिद्धान्तमा दोहोरो मापदण्ड अपनाएको उदाहरणका रूपमा प्रस्तुत गरेको छ। रुसविरुद्धका ईयूका पछिल्ला कदमको उचित प्रतिकार गरिने पनि नियोगले जनाएको छ।
कालासले ईयूका सदस्य राष्ट्रहरू युद्धमा सहभागी रुसी नागरिकमाथि प्रवेश प्रतिबन्ध लगाउने विषयमा छलफलरत रहेको बताएकी छन्। केही सदस्य राष्ट्रले यस्तो प्रतिबन्ध कसरी कार्यान्वयन गर्ने भन्नेबारे प्रश्न उठाएको उनको भनाइ छ। आगामी प्रतिबन्ध प्याकेजमा यो विषय समावेश हुन्छ कि हुँदैन भन्ने निर्णय हुन बाँकी रहेको पनि उनले बताएकी थिइन्।





