एमसीसीमार्फत १८० किमी विद्युत लाइन निर्माणको ठेक्का सम्झौता

काठमाडौं, साउन ३० – नेपाल र अमेरिकी सरकारको संयुक्त लगानीमा सञ्चालित एमसीसी नेपाल कम्प्याक्ट अन्तर्गतको विद्युत प्रसारण आयोजना एक महत्वपूर्ण चरणमा प्रवेश गरेको छ। एमसीए-नेपाल (Millennium Challenge Account – Nepal) ले आज दुई ठूला ठेक्का सम्झौतामा हस्ताक्षर गरेको छ, जसअन्तर्गत झन्डै १५४.५ मिलियन अमेरिकी डलर बराबरको विद्युत् प्रसारण लाइन निर्माण हुनेछ।

ठेक्का सम्झौताहरू एन्जेलिक-स्किपर जेभी र वाइबा-सलासर जेभीसँग गरिएको हो। सम्झौताअनुसार रातमाटेदेखि न्यू दमौली र न्यू दमौलीदेखि न्यू बुटवलसम्मको अनुमानित २९७ किलोमिटर प्रसारण लाइनमध्ये १८० किलोमिटर लाइनको डिजाइन, जडान, परीक्षण र निर्माण कार्य सम्पन्न गरिनेछ।

समारोहमा एमसीसीका कार्यवाहक नायब उपाध्यक्ष जोन विङ्गल, अर्थ सचिव घनश्याम उपाध्याय, कार्यवाहक अमेरिकी राजदूत जेसन मिक्स, एमसीसीका आवासीय देशीय निर्देशक डायान फ्रान्सिस्को, तथा एमसीए-नेपालका कार्यकारी निर्देशक खड्ग विष्ट उपस्थित थिए।

कार्यक्रममा एमसीसीका जोन विङ्गलले कार्यान्वयन साझेदारहरूलाई बधाई दिँदै भने, “यो प्रसारण लाइन नेपालको विकासको लागि एक महत्वपूर्ण कोसेढुङ्गा हो। यसले देशभर विद्युत प्रवाहलाई प्रभावकारी बनाउने, मूल्य सस्तो बनाउने र दीर्घकालीन आर्थिक वृद्धिका अवसरहरू सिर्जना गर्नेछ।”

कार्यवाहक अमेरिकी राजदूत जेसन मिक्सले सम्झौतालाई अमेरिकी सहयोगको ठोस प्रतीक भन्दै भने, “यो केवल निर्माण सम्झौता होइन, यो नेपालप्रतिको अमेरिकाको स्थायी प्रतिबद्धताको मूर्त उदाहरण हो। हामी विद्युत लाइन र पूर्वाधार मात्र होइन, नेपालको दीर्घकालीन समृद्धिमा पनि लगानी गर्दैछौं।”

एमसीसी कम्प्याक्ट सम्झौता नेपाल र अमेरिकाबीचको रणनीतिक सहकार्यको आधारशिला हो। सम्झौता अन्तर्गत नेपालमा विद्युत प्रसारण पूर्वाधार विस्तार तथा सडक सुधार कार्य गरिँदैछ, जसबाट दीर्घकालीन रूपमा नेपालका घरपरिवार, उद्योग तथा उद्यमहरूलाई लाभ पुग्ने अपेक्षा गरिएको छ।