नेकपा एमाले सचिवालयले ११औं महाधिवेशनका लागि प्रतिनिधि संख्या तोक्यो
काठमाडौं / नेकपा (एमाले) को आज सम्पन्न सचिवालय बैठकले आगामी ११औं महाधिवेशनका लागि प्रतिनिधि संख्या र संरचना निर्धारण गरेको छ। बैठकले विभिन्न तहका संरचनाबाट प्रतिनिधि छनोटका मापदण्ड तय गरेको छ, जसअनुसार करिब २,२०० प्रतिनिधि महाधिवेशनमा सहभागी हुनेछन्।
नेकपा (एमाले) को सचिवालय बैठकले ११औं महाधिवेशनका लागि प्रतिनिधि संख्या र छनोटका मापदण्ड निर्धारण गरेको छ। पार्टी केन्द्रीय कार्यालयका अनुसार, आज सम्पन्न बैठकले संगठनका सबै तहबाट प्रतिनिधि चयनका विस्तृत मापदण्ड पारित गरेको हो।
निर्णयअनुसार, हरेक प्रतिनिधि सभा निर्वाचन क्षेत्रबाट पहिलो १,२०० सदस्यका आधारमा ४ प्रतिनिधि जसमा एक महिला, एक ४० वर्ष मुनिको युवा र दुई खुला श्रेणीका हुनेछन् चयन गरिनेछ। त्यसपछि हरेक थप ८०० सदस्यबाट एक जना प्रतिनिधि थपिने व्यवस्था गरिएको छ।
त्यस्तै, प्रदेश कमिटीहरूबाट पाँच जना (कम्तीमा दुई महिला सहित) गरी जम्मा ४५ जना प्रतिनिधि रहनेछन्। विशेष जिल्ला कमिटी ११ वटाबाट ४७ जना प्रतिनिधि रहने निर्णय गरिएको छ।
प्रवास क्षेत्रका लागि ३० जना प्रतिनिधि तोकिएको छ भने केन्द्रीय कार्यालय र ३२ विभागहरूबाट जनही एक–एक गरी ३३ जना रहने व्यवस्था गरिएको छ।
जनसंगठनहरूबाट १२७ जना प्रतिनिधि रहनेछन्, जसमा महासंघ ढाँचाका संगठनहरूबाट ७ र अन्य संगठनहरूबाट ५ जनाका दरले प्रतिनिधि चयन गरिने निर्णय गरिएको छ।
त्यसबाहेक मनोनित प्रतिनिधि, केन्द्रीय कमिटीका ३५४ सदस्य, केन्द्रीय अनुशासन आयोगका २९, केन्द्रीय लेखा आयोगका ३०, निर्वाचन आयोगका २५, र केन्द्रीय सल्लाहकार समितिका २५ सदस्य पनि महाधिवेशनमा सहभागी हुनेछन्।
यी सबै स्रोतहरूबाट गणना गर्दा आगामी ११औं महाधिवेशनमा करिब २,२०० प्रतिनिधि सहभागी हुने अनुमान गरिएको छ।
सचिवालय बैठकमा पार्टी अध्यक्ष केपी शर्मा ओलीको अध्यक्षता रहेको थियो। बैठकले संगठन सुदृढीकरण र महाधिवेशन तयारीका अन्य विषयमा समेत छलफल गरेको बुझिएको छ।
