चिनियाँ विश्वविद्यालयमा संयुक्त राष्ट्र संघको झल्को, नेपाली परिकारको चर्चा

चीनको मध्य भागमा अवस्थित हुपेइ प्रान्तको राजधानी वुहानमा विश्वविद्यालयका विद्यार्थीहरुले विशेष कार्यक्रम आयोजना गरेर संयुक्त राष्ट्र संघको झल्को दिएका छन् ।

स्थानीय हुआचोङ साइन्स एण्ड टेक्नोलोजी युनिभर्सिटीमा अध्ययनरत विभिन्न मुलुकका विद्यार्थीले एउटै थलोमा आयोजना गरेको संस्कृति,भेषभुषा, रहनसहन,खानपान,विभिन्न विशेषतायुक्त विशेष कार्यक्रमबाट चिनियाँ र विदेशी विद्यार्थीहरुले आफूहरु निकै प्रभावित भएको प्रतिक्रिया दिएका छन् ।

नेपाल,पाकिस्तान,म्यानमार,थाइल्याण्ड, लाओस,इरान,अफगानिस्तान, जापानदेखि एसिया,युरोप,अफ्रिका, अमेरिका, क्यानाडा विभिन्न मुुलुकका विद्यार्थीले छुट्टाछुट्टै स्टल राखेका थिए । नेपालले झैं केही मुलुकले नेपाली स्वादका परिकार पस्केका थिए। नेपाली स्टलमा पुगेका विदेशीहरुले काँक्रो र मुलाको अचारसहितको परिकार स्वादिष्ट भन्दै तारिफ गरेका थिए ।

कार्यक्रममा कतिपय मुलुकका विद्यार्थीले परम्परागत पोशाकमा नाचगान गरेका थिए भने कतिपयले विभिन्न परिचय झल्कने सामाग्री प्रस्तुत गरेको देखिन्थ्यो । ६२ हजारभन्दा बढी विद्यार्थी अध्ययनरत यो विद्यालयमा १५ सय बढी विदेशी छन् । कार्यक्रममा सहभागी एकजना विद्यार्थीका अनुसार दक्षिण एसियाली मुलुकहरुबाट धेरै विद्यार्थी भए पनि यो वर्ष भारतका एक जना मात्रै छन् । नेपालका दर्जनौं र पाकिस्तानका सबैभन्दा बढी देखिएको जनआस्था डटकमले जनाएको छ।

धेरैजसो एसियाली र अफ्रिकी मुलुकका विद्यार्थीले परिकार चखाएका थिए । एक मुलुकका विद्यार्थीले अर्को मुलुकका विद्यार्थी साथीको स्टलमा गएर खाना खाएको, नाचगान गरेको माहोल निकै मनमोहक र आकर्षक देखिन्थ्यो । साउदी अरबलगायत विभिन्न इस्लामिक मुलुकका स्टल बाहिर अरबिक गीत संगीतमा नाच्नेहरु धेरै थिए।

उत्तर कोरियाली स्टलमा त्यहाँका विद्यार्थीले इच्छुकलाई आफ्नो देशको रक्सी र चुरोट चखाएका थिए । यता यमन,साउदी अरबको स्टलसँगै रहेको अजरबैजानले रक्सी चखाउने भएपछि बीचमा नेपालको स्टल राखेर रक्सी चखाउने र रक्सी बर्जितहरु सँगसँगै नराख्ने बीचको बाटो अपनाइएको थियो ।

CGTN