अमेरिकी राजदूतले नेपालमा Veel App उद्घाटन गर्दै, प्रविधि साझेदारी बलियो रहेको बताउनुभयो
काठमाडौं — अमेरिकी कम्पनी Veel App ले काठमाडौं स्थित आफ्नो कार्यालय र नयाँ उत्पादनहरूको आज औपचारिक उद्घाटन गरेको छ। कार्यक्रममा नेपालका लागि अमेरिकी राजदूत डीन थम्पसनले उपस्थिति जनाउँदै नेपाल–अमेरिका टेक सहकार्यलाई अझ गहिरो बनाउँदै लगिएको बताउनुभयो।
नेपाली–अमेरिकी उद्यमी दिलीप ढकालले स्थापना गरेको Veel ले विश्वभरका कन्टेन्ट क्रिएटरहरूलाई शीर्ष ब्रान्डहरूसँग जोड्ने डिजिटल प्लेटफर्मका रूपमा सेवा प्रदान गर्छ। कम्पनीले अमेरिकी तथा अन्य अन्तर्राष्ट्रिय ब्रान्डहरूसँग क्रिएटरहरूको सहकार्यलाई सहज, प्रभावकारी र नाफामुखी बनाउन विभिन्न उपकरणहरू विकास गर्दै आएको छ।
हाल कम्पनीले अमेरिका र नेपाल दुवै स्थानमा रोजगारी सिर्जना गरिरहेको छ भने आगामी वर्षहरूमा थप अवसर विस्तार गर्ने योजना रहेको ढकालले जानकारी दिएका छन्।
उद्घाटन समारोहमा राजदूत थम्पसनले नेपाललाई टेक्नोलोजी र नवप्रवर्तनका लागि उदीयमान गन्तव्यका रूपमा औंल्याउँदै Veel जस्ता अमेरिकी कम्पनीहरूले यहाँ उच्च सम्भावना देखिरहेका छन् भन्नुभयो। उहाँका अनुसार यस्ता उद्यमहरूले अमेरिकी कन्टेन्ट क्रिएटरहरूलाई विश्व बजारमा अझ प्रतिस्पर्धी र लाभदायी बनाउन सहयोग गर्ने मात्र होइन, नेपालमा निजी क्षेत्रको नेतृत्वमा आर्थिक वृद्धि तथा रोजगारी विस्तारमा पनि योगदान पुर्याइरहेका छन्।
राजदूतले नेपाली सीप विकास, ऊर्जा स्रोत सुदृढीकरण तथा डिजिटल अर्थतन्त्र प्रवर्द्धनमा अमेरिकाको निरन्तर सहयोगले दुवै राष्ट्रका लागि नयाँ अवसरहरूको ढोका खोलिरहेको उल्लेख गर्दै आगामी दिनमा टेक सहकार्य अझ व्यापक बन्ने विश्वास व्यक्त गर्नुभयो।
यो कार्यक्रमले नेपाल र अमेरिकाबीच बढ्दो आर्थिक सहयोग र प्रविधि क्षेत्रको गतिशीलताको एक उदाहरण प्रस्तुत गरेको छ।
