कांग्रेसको १५औँ महाधिवेशनको तालिकाबारे देउवापक्षको पत्र निर्वाचन आयोगमा
ड्रागन मिडिया सम्वाददाता
नेपाली कांग्रेसका पूर्वसभापति शेरबहादुर देउवापक्षले पार्टीको १५औँ महाधिवेशनसम्बन्धी आफ्नो तालिका निर्वाचन आयोगलाई जानकारी गराएको छ। देउवानिकट एक नेताका अनुसार असोज १५ गतेदेखि प्रक्रिया शुरु गरी मङ्सिर २१ देखि २३ गतेसम्म महाधिवेशन गर्ने तयारी उल्लेख गरिएको पत्र आयोगमा दर्ता भएको हो।
कांग्रेसको अर्को पक्षले असोज १८ गतेदेखि महाधिवेशनको प्रक्रिया अघि बढाउने तयारी गरिरहेका बेला देउवापक्षबाट पृथक तालिका आयोगमा पठाइएको हो। गत पुसमा भएको विशेष महाधिवेशनपछि पार्टीको नेतृत्व र महाधिवेशन प्रक्रियाबारे दुवै पक्षबीच विवाद कायम छ।
आयोगमा पत्र दर्ता भएको देउवानिकट नेताको भनाइ हो। पत्रको विषयवस्तु र आयोगले त्यसबारे लिने निर्णय सार्वजनिक भएपछि मात्रै महाधिवेशन तालिकाको औपचारिक स्थिति स्पष्ट हुनेछ।
