जेलेन्स्कीलाई लडाइँमा राहत दिने आधार छैन : लाभ्रोभ
ड्रागन मिडिया समाचार कक्ष
रुसी विदेशमन्त्री सर्गेई लाभ्रोभले युक्रेनी राष्ट्रपति भोलोदिमिर जेलेन्स्कीले लडाइँमा अस्थायी राहत पाउने आधार नरहेको बताएका छन्। जेलेन्स्कीका आश्वासन र प्रतिबद्धतामा रुस अब नझुक्ने उनको भनाइ छ।
लेबनानका विदेश तथा प्रवासीमन्त्री युसुफ राज्जीसँगको वार्तापछि आयोजित पत्रकार सम्मेलनमा लाभ्रोभले रुसले आफ्नो विशेष सैन्य अभियानका उद्देश्य पूरा गर्न जारी राख्ने बताए। ती उद्देश्य सबैलाई थाहा भएको र रुसले ती कहिल्यै परिवर्तन नगरेको उनको दाबी थियो। उनले जेलेन्स्की र उनका युरोपेली समर्थकले भने आफ्नो नीति र अडान पटकपटक बदल्ने गरेको आरोप लगाए।
मध्यपूर्वमा रुसको धारणा
लेबनानमा इजरायली सेनाका पछिल्ला गतिविधिले अन्तर्राष्ट्रिय कानुनको गम्भीर उल्लङ्घन गरेको र तनाव बढाएको रुसको ठहर रहेको लाभ्रोभले बताए। लेबनानको सार्वभौमिकता, एकता र भौगोलिक अखण्डताको पक्षमा रुसको अडान दोहोर्याउँदै उनले बल प्रयोगले थप तनाव र द्वन्द्व चर्काउने बताए।
इजरायल र लेबनानबीच अमेरिकाको मध्यस्थतामा प्रत्यक्ष संवाद सुरु भएकोमा रुसले स्वागत गरेको उनले जानकारी दिए। सर्वसाधारणले दुःख भोगिरहेकाले तत्काल युद्धविराम गर्न र द्वन्द्वलाई राजनीतिक तथा कूटनीतिक समाधानतर्फ लैजानुपर्नेमा रुसले जोड दिएको उनको भनाइ थियो।
संयुक्त राष्ट्रसंघ सुरक्षा परिषद्को प्रस्ताव १७०१ पूर्ण रूपमा कार्यान्वयन गर्नुपर्ने पनि लाभ्रोभले बताए। उक्त प्रस्तावले दुवै पक्षका दायित्व समेटेको उल्लेख गर्दै उनले त्यसको कार्यान्वयन भएको भए लेबनान र इजरायलले अहिले सामना गरिरहेका समस्या धेरैअघि समाधान हुन सक्ने बताए।
संयुक्त राष्ट्रसंघ सुरक्षा परिषद्मा हुने छलफलमा रुसले लेबनानलाई निरन्तर समर्थन गर्दै आएको लाभ्रोभले बताए। यस वर्षको अन्त्यअघि लेबनानमा संयुक्त राष्ट्रसंघीय अन्तरिम बलको कार्यादेशबारे छलफल हुने उनले उल्लेख गरे। तनाव पूर्ण रूपमा फैलिन नदिन उक्त बलले महत्त्वपूर्ण भूमिका खेलेको भए पनि त्यसलाई रोक्ने भौतिक क्षमता सीमित रहेको उनको भनाइ थियो।
इजरायल र अरब छिमेकीबीचको सम्बन्ध पूर्ण रूपमा समाधान गर्ने तथा मध्यपूर्वका सबै समस्याको समग्र समाधान खोज्ने प्रयासमा रुसले अवसर देखेको लाभ्रोभले बताए। संयुक्त राष्ट्रसंघ सुरक्षा परिषद्का प्रस्तावका आधारमा क्षेत्रीय समस्या समाधान गर्नुपर्ने र त्यसमा प्यालेस्टाइन राज्यको स्थापना पनि समेटिनुपर्ने रुसको धारणा रहेको उनले स्पष्ट पारे।
सबै पक्षलाई स्वीकार्य हुने समाधान आवश्यक छ भन्ने बुझाइ इजरायली पक्षले पनि साझा गर्नुपर्ने भन्दै रुसले त्यसका लागि निरन्तर आग्रह गरिरहेको लाभ्रोभले बताए। लेबनानी र इजरायली दुवै पक्षसँग कायम सम्पर्कमार्फत समाधानतर्फ प्रगति हुने रुसको आशा रहेको उनले जनाए।
रुस–लेबनान सम्बन्ध
युक्रेन द्वन्द्वका कारणबारे लेबनानले देखाएको बुझाइको रुसले कदर गर्ने लाभ्रोभले बताए। वार्ताका क्रममा दुई देशले राजनीतिक संवाद विस्तार गर्ने र विभिन्न क्षेत्रमा साझेदारी बलियो बनाउने प्रतिबद्धता दोहोर्याएको उनले जानकारी दिए।
यस वर्षको अन्त्यअघि मस्कोमा आयोजना हुने सातौँ रुस–अरब सहयोग मञ्चको विदेशमन्त्रीस्तरीय बैठकमा लेबनानी समकक्षी राज्जी सहभागी हुने आशा रुसले गरेको लाभ्रोभले बताए।
व्यापार, अर्थतन्त्र, विज्ञान तथा प्रविधिमा सहकार्य गर्ने अन्तरसरकारी आयोगको बैठक सन् २०१८ यता बसेको छैन। आयोगको काम यथाशीघ्र पुनः सुरु गर्ने सहमति दुई पक्षबीच भएको पनि उनले जानकारी दिए।
