चिनियाँ विदेशमन्त्री वाङ यी सीआईसीए शिखर सम्मेलनमा सहभागी हुने, चार देशको भ्रमण गर्ने
ड्रागन मिडिया समाचार कक्ष
चिनियाँ विदेशमन्त्री वाङ यी अक्टोबर १५ मा अजरबैजानको बाकुमा हुने एसियामा अन्तरक्रिया तथा विश्वास निर्माणका उपायसम्बन्धी सम्मेलन (सीआईसीए) को सातौँ शिखर सम्मेलनमा सहभागी हुने भएका छन्। चिनियाँ विदेश मन्त्रालयका अनुसार उनी राष्ट्रपति सी चिनफिङका विशेष प्रतिनिधिका रूपमा सम्मेलनमा सहभागी हुनेछन्।
वाङले अक्टोबर १४ देखि २० सम्म अजरबैजान, क्रोएसिया, मोन्टेनेग्रो र बुल्गेरियाको भ्रमण गर्ने मन्त्रालयले जनाएको छ।
चिनियाँ विदेश मन्त्रालयकी प्रवक्ता माओ निङले सीआईसीए एसियामा सुरक्षा संवाद र सहकार्यका लागि महत्त्वपूर्ण संयन्त्र भएको बताइन्। सम्मेलनले सदस्य राष्ट्रबीच अन्तरक्रिया र विश्वास निर्माण गर्दै क्षेत्रीय सुरक्षा, स्थिरता र विकासमा योगदान पुर्याएको उनको भनाइ थियो।
अन्तर्राष्ट्रिय तथा क्षेत्रीय परिस्थिति जटिल बन्दै गएको अवस्थामा एसियाली देशहरू शान्ति र स्थिरता कायम राख्न तथा आर्थिक विकास अघि बढाउन इच्छुक रहेको माओले बताइन्। शिखर सम्मेलनमा चीनले विभिन्न पक्षसँग संवाद र परामर्श गर्ने, बहुपक्षीयताको अभ्यास गर्ने र एसियाली शासन व्यवस्थालाई सुदृढ पार्ने उनले जनाइन्।
अजरबैजान चीनको व्यापक रणनीतिक साझेदार रहेको र दुई देशबीच राजनीतिक विश्वास तथा बेल्ट एन्ड रोड सहकार्य बढ्दै गएको मन्त्रालयले जनाएको छ। वाङले अजरबैजानी विदेशमन्त्री जेयहुन बेरामोभसँग वार्ता गर्नेछन्। यो सात वर्षपछि वाङको अजरबैजानमा हुन लागेको पहिलो औपचारिक भ्रमण हो।
क्रोएसिया, मोन्टेनेग्रो र बुल्गेरियासँग अर्थतन्त्र, व्यापार, लगानी, पर्यटन र पूर्वाधारका क्षेत्रमा सहकार्यका परिणाम हासिल भएको माओले बताइन्। भ्रमणका क्रममा वाङले ती देशका विदेशमन्त्री र नेताहरूसँग भेटवार्ता गर्नेछन्। यस वर्ष चीन र मोन्टेनेग्रोबीच कूटनीतिक सम्बन्ध स्थापना भएको २० वर्ष पुगेको छ।
