विवाह दर्ताका नयाँ शैलीले चीनमा ‘माया अर्थतन्त्र’ विस्तार

ड्रागन मिडिया समाचार कक्ष

चीनमा विवाह दर्तालाई युवायुवतीका रुचि र जीवनकथासँग जोड्ने नयाँ स्थल तथा सेवाको विस्तारसँगै विवाह र पर्यटनमा आधारित ‘माया अर्थतन्त्र’ बढ्दै गएको छ। खेलकुद मैदान, सङ्गीत महोत्सव, विश्वविद्यालय परिसर र पर्यटकीय गन्तव्यमा विवाह दर्ता तथा सामूहिक विवाह समारोह आयोजना हुन थालेका छन्।

चीनले सन् २०२५ को मेदेखि जोडीले आफ्नो घरदर्ता भएको स्थानमै विवाह दर्ता गर्नुपर्ने व्यवस्था हटाएको थियो। त्यसपछि जोडीहरूले देशभरका योग्य नागरिक मामिला कार्यालयमा विवाह दर्ता गर्न पाउने भएका छन्। यसले विवाह दर्तासँगै यात्रा र समारोह जोड्न सहज बनाएको चिनियाँ सञ्चारमाध्यमले जनाएका छन्।

हालै जियाङ्सु प्रान्तको उशी शहरमा भएको फुटबल प्रतियोगिताका क्रममा रंगशालाबाहिर अस्थायी विवाह दर्ता स्थल बनाइएको थियो। खेलप्रेमी एक जोडीले प्रशंसक र परिवारजनको उपस्थितिमा विवाह दर्ता गरे। नान्जिङमा परम्परागत पोशाक लगाएर दर्ता गर्ने सुविधा छ भने केही शहरले सङ्गीत महोत्सव र विश्वविद्यालय परिसरमा पनि विवाह समारोह आयोजना गरेका छन्।

चीनको नागरिक मामिला मन्त्रालयका अनुसार सन् २०२५ को अन्त्यसम्म देशभर विवाह प्रमाणपत्र प्रदान गर्ने १ हजार ३३० बाहिरी स्थल र उद्यान तथा पर्यटकीय स्थानमा ५२५ विवाह दर्ता केन्द्र स्थापना भएका थिए। विवाह प्रमाणपत्रसँगै व्यक्तिगत अनुभव, समारोहको विशेषता र सम्झनायोग्य क्षणलाई युवाले महत्त्व दिन थालेको सुझोउ विश्वविद्यालयका प्राध्यापक चाउ योङ्बोले बताएका छन्।

युनान प्रान्तको लिजियाङमा विवाह, छायाचित्रण र हनिमुन यात्रालाई जोडेर व्यावसायिक सेवा विस्तार गरिएको छ। सन् २०२५ मा त्यहाँ १ लाख ४० हजारभन्दा बढी जोडी पुगेका थिए र विवाह उद्योगको बजार १.१ अर्ब युआनभन्दा बढी भएको थियो। एउटा विवाह आयोजक कम्पनीले आफ्नो सेवा विशेष विवाह समारोहमा केन्द्रित गरेको पहिलो वर्षमै २८० भन्दा बढी समारोह आयोजना गरेको जनाएको छ।

लिजियाङमा विवाहका छायाचित्र प्याकेज करिब १० हजार युआनदेखि उपलब्ध छन्। यस्ता प्याकेजमा पोशाक, शृङ्गार, निजी यातायात र आवास समावेश हुन सक्छन्। युनानको दालीमा पनि ताल किनार र बाइ समुदायका परम्परागत आँगनसहित ३० भन्दा बढी विवाह स्थल तयार गरिएका छन्। जोडीहरूले विवाह समारोहसँगै स्थानीय पर्यटकीय क्षेत्र घुम्ने अवसर पाएका छन्।

स्थानीय सरकारले दर्ता प्रक्रियालाई सहज बनाउनुका साथै स्वास्थ्य र कानुनी परामर्श सेवा पनि थपिरहेका छन्। बेइजिङको हाइदियान जिल्लामा विवाह दर्ता कार्यालयसँगै विवाहपूर्व स्वास्थ्य जाँच केन्द्र सञ्चालन गरिएको छ। छेङ्दुमा अदालतका कर्मचारीले विवाहसम्बन्धी कानुनी अधिकार, संयुक्त सम्पत्ति र पारिवारिक विवाद समाधानबारे जोडीलाई जानकारी दिन थालेका छन्।

नवविवाहितलाई सहयोग गर्न केही स्थानले विवाह खर्चमा प्रयोग गर्न सकिने कुपन र प्रोत्साहन योजना ल्याएका छन्। धेरै प्रदेशले विवाह बिदा अवधि बढाएका छन्; सबैभन्दा लामो अवधि ३० दिनसम्म पुगेको छ। चीनले सन् २०२५ मा सन्तान जन्माउने र हुर्काउने परिवारलाई सहयोग गर्न २३ वटा उपाय घोषणा गरेको थियो। केही स्थानमा सुत्केरीसम्बन्धी उपचार खर्च निःशुल्क वा लगभग निःशुल्क गरिएको छ भने जियाङ्सुमा बालहेरचाह सेवाका लागि कुपन उपलब्ध गराइएको छ।

विवाहपूर्व शिक्षा र कानुनी परामर्शलाई नयाँ दर्ता सेवासँग जोड्दा युवालाई विवाहका अधिकार र दायित्व बुझ्न सहयोग पुग्ने प्राध्यापक चाउले बताएका छन्। उनका अनुसार प्रेम र विवाहसँग जोडिएको व्यवसायलाई दिगो बनाउन सार्वजनिक सेवामा निरन्तर नवीनता आवश्यक छ।