अमेरिकी आर्थिक दबाबसामु इरानले आत्मसमर्पण नगर्ने राष्ट्रपति पेजेस्कियानको भनाइ
ड्रागन मिडिया समाचार कक्ष
इरानी राष्ट्रपति मसुद पेजेस्कियानले अमेरिकी आर्थिक दबाबका कारण इरानी जनताले आत्मसमर्पण नगर्ने बताएका छन्। उनले अमेरिकाले प्रत्यक्ष दबाबबाट इरानलाई झुकाउन नसकेपछि आर्थिक तथा जनजीविकासम्बन्धी कठिनाइमार्फत दबाब बढाउन खोजेको आरोप लगाए।
नयाँ दिल्लीमा भारतीय धार्मिक नेता, विशिष्ट व्यक्तित्व तथा व्यवसायीसँग शुक्रबार भएको भेटमा राष्ट्रपति पेजेस्कियानले यस्तो धारणा राखेको इरानको सरकारी समाचार संस्था इर्नाले जनाएको छ।
पेजेस्कियानले अमेरिकाले धम्की र दबाबबाट इरानी जनतालाई आत्मसमर्पण गराउन नसकेपछि जनजीविकामा समस्या सिर्जना गर्ने र आवश्यक सुविधा कमजोर बनाउने माध्यमबाट देशलाई झुकाउने प्रयास गरिरहेको बताए।
“इरानी जनताले आत्मसमर्पण गर्ने छैनन्,” उनले भने।
उनले अमेरिकाले इरानविरुद्ध लगाएको भनिएको नौसैनिक नाकाबन्दी तथा आर्थिक दबाबको आलोचना गर्दै वासिङ्टनले इरानलाई स्वतन्त्र राष्ट्रका रूपमा अघि बढ्न नदिन खोजेको आरोप लगाए। इरान अमेरिकी दबाबसामु नझुक्ने उनको भनाइ थियो।
इरानमाथि अमेरिकी आर्थिक दबाब पछिल्ला महिनामा थप तीव्र भएको छ। तेहरानले अमेरिकी नीतिलाई आर्थिक युद्धका रूपमा व्याख्या गर्दै आएको छ भने वासिङ्टनले इरानमाथि आर्थिक तथा रणनीतिक दबाब बढाउने नीति अपनाएको बताउँदै आएको छ।
गत महिना अमेरिकी राष्ट्रपति डोनाल्ड ट्रम्पले इरानलाई आर्थिक सहायता वा जीवनरेखा उपलब्ध गराउने मुलुक तथा पक्षविरुद्ध अभूतपूर्व आर्थिक कारवाही अघि बढाउने घोषणा गरेका थिए। उनले यसलाई इरानविरुद्ध व्यापक आर्थिक युद्ध र अन्तर्राष्ट्रिय अलगावको रणनीतिका रूपमा प्रस्तुत गरेका थिए।
पेजेस्कियानको पछिल्लो अभिव्यक्ति उनी ब्रिक्स शिखर सम्मेलनका लागि नयाँ दिल्लीमा रहेका बेला आएको हो। यसले इरानले बढ्दो अमेरिकी दबाबका बीच भारतसहित ब्रिक्स तथा अन्य साझेदार मुलुकसँग आर्थिक र राजनीतिक सम्बन्ध विस्तारलाई महत्व दिइरहेको सन्देश दिएको छ।
