चीनको सिचाङ स्वायत्त क्षेत्रको पार्टी सचिवमा हु छाङशङ नियुक्त
ड्रागन मिडिया समाचार कक्ष
चिनियाँ कम्युनिस्ट पार्टीको केन्द्रीय समितिले हु छाङशङलाई सिचाङ स्वायत्त क्षेत्रको पार्टी सचिवमा नियुक्त गरेको छ। मङ्गलबार घोषणा गरिएको निर्णयअनुसार उनले वाङ चुनचङको स्थान लिएका हुन्। नयाँ जिम्मेवारीसँगै हु गान्सु प्रान्तको पार्टी सचिव पदबाट मुक्त भएका छन्।
चिनियाँ समाचार संस्था सिन्ह्वाका अनुसार केन्द्रीय समितिले सिचाङसँगै गान्सु र छिङहाइ प्रान्तको नेतृत्वमा पनि परिवर्तन गरेको छ। छिङहाइका पार्टी सचिव वु स्याओचुनलाई गान्सुको पार्टी सचिव नियुक्त गरिएको छ भने छिङहाइका गभर्नर लुओ तोङछ्वानले उक्त प्रान्तको पार्टी सचिवको जिम्मेवारी सम्हालेका छन्।
सन् १९६३ डिसेम्बरमा जन्मिएका हु चिनियाँ कम्युनिस्ट पार्टीको बीसौँ केन्द्रीय समितिका सदस्य हुन्। उनले यसअघि सिचुवान, छिङहाइ, फुचियान र हेइलोङचियाङमा विभिन्न नेतृत्वदायी जिम्मेवारी सम्हालेका थिए। सन् २०२२ डिसेम्बरदेखि उनी गान्सु प्रान्तको पार्टी सचिव थिए।
सेप्टेम्बर २२ मा सिचाङमा आयोजित नेतृत्व बैठकमा चिनियाँ कम्युनिस्ट पार्टीको केन्द्रीय संगठन विभागका उपप्रमुख हाओ चुनहुईले केन्द्रीय समितिको निर्णय घोषणा गरेका थिए। चिनियाँ आधिकारिक विवरणअनुसार क्षेत्रीय नेतृत्वको आवश्यकता र समग्र प्रशासनिक व्यवस्थालाई ध्यानमा राखेर यो परिवर्तन गरिएको हो।
