चिनियाँ अन्तरिक्ष केन्द्रमा पुग्ने पहिलो विदेशी अन्तरिक्षयात्री पाकिस्तानी हुने
ड्रागन मिडिया समाचार कक्ष
पाकिस्तानी अन्तरिक्षयात्री चीनको शेनझोउ–२४ मानवयुक्त अन्तरिक्ष उडानमा वैज्ञानिक उपकरण विशेषज्ञका रूपमा सहभागी हुने भएका छन्। चीनको मानवयुक्त अन्तरिक्ष निकायले शनिबार दिएको जानकारीअनुसार छोटो समय अन्तरिक्ष केन्द्रमा बिताएपछि उनी शेनझोउ–२३ यानबाट पृथ्वी फर्कनेछन्।
यो चीनको मानवयुक्त अन्तरिक्ष कार्यक्रमको इतिहासमा चिनियाँ र विदेशी अन्तरिक्षयात्रीले संयुक्त रूपमा उडान गर्ने पहिलो मिसन हुनेछ। यससँगै चीनको अन्तरिक्ष केन्द्रमा पुग्ने पहिलो विदेशी अन्तरिक्षयात्री पनि पाकिस्तानी हुनेछन्।
चीन र पाकिस्तानले सन् २०२५ मा पाकिस्तानी अन्तरिक्षयात्री छनोट, तालिम र चीनको अन्तरिक्ष केन्द्रको उडानमा सहभागितासम्बन्धी सहमतिमा हस्ताक्षर गरेका थिए। छनोट प्रक्रियाबाट दुई जना पाकिस्तानीलाई आरक्षित अन्तरिक्षयात्रीका रूपमा छानिएको थियो। तालिम र मूल्याङ्कनपछि उनीहरूमध्ये एक जना मिसनमा सहभागी हुनेछन्।
