६ मंसिर २०८३, शनिबार

भारत भ्रमणअघि औपचारिक परामर्श नगरेको भन्दै सरकारको आलोचना

ड्रागन मिडिया सम्वाददाता

प्रधानमन्त्री वालेन्द्र शाहको भारत भ्रमणअघि पूर्वप्रधानमन्त्री, पूर्वपरराष्ट्रमन्त्री र संसदमा प्रतिनिधित्व गर्ने दलसँग औपचारिक परामर्श नगरेको भन्दै सरकारको आलोचना भएको छ। राष्ट्रपति रामचन्द्र पौडेललाई पनि शनिबारसम्म सरकारले भ्रमणबारे औपचारिक जानकारी नगराएको राष्ट्रपति कार्यालयका एक अधिकारीलाई उद्धृत गर्दै कान्तिपुरले जनाएको छ। प्रधानमन्त्री शाह भारतीय प्रधानमन्त्री नरेन्द्र मोदीको निमन्त्रणामा आइतबार भारत प्रस्थान गर्दैछन्।

पूर्वपरराष्ट्रमन्त्री तथा नेपाली कांग्रेसका नेता एनपी साउदले उच्चस्तरीय विदेश भ्रमणअघि गरिने परामर्शले राष्ट्रिय हितका विषयमा साझा धारणा बनाउन र विगतका वार्ता, सहमति तथा प्रतिबद्धताको अवस्था बुझ्न सघाउने बताए। उनका अनुसार पूर्वप्रधानमन्त्री र पूर्वपरराष्ट्रमन्त्रीका अनुभवले कुन विषयमा वार्ता कहाँ पुगेको छ र अब के गर्नुपर्छ भन्ने निर्क्योल गर्न सरकारलाई मद्दत गर्छ।

साउद परराष्ट्रमन्त्री रहेका बेला २०८० जेठमा तत्कालीन प्रधानमन्त्री पुष्पकमल दाहालको भारत भ्रमणअघि पूर्वप्रधानमन्त्री, पूर्वपरराष्ट्रमन्त्री, पूर्वपरराष्ट्र सचिव तथा भारतका लागि पूर्वराजदूतसँग छलफल गरिएको थियो। त्यस क्रममा सीमा, प्रबुद्ध व्यक्ति समूह (ईपीजी) को प्रतिवेदन, पञ्चेश्वर आयोजना, हवाई मार्ग, व्यापार र पारवहनबारे सुझाव लिइएको थियो। तत्कालीन प्रधानमन्त्री केपी शर्मा ओलीको २०८२ भदौको चीन भ्रमणअघि पनि पूर्वप्रधानमन्त्री र पूर्वपरराष्ट्रमन्त्रीसँग परामर्श गरिएको कान्तिपुरले उल्लेख गरेको छ।

विगतमा प्रधानमन्त्रीले विदेश भ्रमणअघि राष्ट्रपतिलाई कार्यक्रमबारे जानकारी दिने र फर्किएपछि वार्ता तथा उपलब्धिबारे अवगत गराउने अभ्यास थियो। साउदले यसलाई संवैधानिक संस्थाबीचको नियमित समन्वयसँग जोडेर हेर्नुपर्ने बताए। यसपटक राष्ट्रपतिलाई औपचारिक जानकारी गराइएको छ कि छैन भन्नेबारे सरकारको प्रतिक्रिया कान्तिपुरको विवरणमा समेटिएको छैन।

Show More

Leave a Reply

Your email address will not be published. Required fields are marked *

Back to top button