खजुरामा युवा शक्ति जाग्दै: ब्रदर्स फुटबल क्लबको समाजसेवी उदाहरणीय पहल

खजुरा, बाँके — खेलकुदलाई माध्यम बनाएर समाज रूपान्तरणको अभियान अघि बढिरहेको ब्रदर्स फुटबल क्लब, खजुरा–४ ले पछिल्लो समय उदाहरणीय सामाजिक भूमिका निर्वाह गर्दै स्थानीय स्तरमा सकारात्मक सन्देश प्रवाह गरेको छ।

हालै सम्पन्न मुसकटवा बाबा (काकाकुट्टी) मेला सफलतापूर्वक आयोजना गर्दै क्लबले व्यवस्थापन, पारदर्शिता र सामाजिक उत्तरदायित्वको उत्कृष्ट नमुना प्रस्तुत गरेको छ। सम्भवतः धेरै वर्षपछि पहिलोपटक मेला आम्दानीबाट निश्चित प्रतिशत रकम स्थानीय वडा कार्यालय, नेपाल रेडक्रस सोसाइटी बागेश्वरी उपशाखा, तथा मुसकटवा बाबा मन्दिर व्यवस्थापन पक्षलाई औपचारिक रूपमा हस्तान्तरण गर्ने पहिलो क्लब ब्रदर्स फुटबल क्लब बनेको क्लबले जनाएको छ।

यो कदमले मेलालाई केवल मनोरञ्जनको अवसर नभई समुदायको समृद्धि र सहकार्यको आधार बनाउने प्रयासका रूपमा हेरिएको छ। स्थानीयवासीहरूका अनुसार यस किसिमको पारदर्शी आर्थिक सहयोगले सामाजिक विश्वास बलियो बनाएको छ। र, युवाहरू पनि समाजप्रति जवाफदेही छन् र स्थानीय सरकारसँगसँगै हातेमालो गरेर अगाडि बढ्न सकिन्छ भन्ने उदाहरण प्रस्तुत गरेका छन्।

खेलकुद प्रवर्द्धनलाई निरन्तरता दिँदै क्लबले आगामी दिनमा सञ्चालन हुने रात्रिकालीन फुटबल प्रतियोगिता (Night Tournament) का लागि आधुनिक हालोजन लाइट जडान गरेको छ। यसले खेलाडीहरूलाई स्तरीय र मैत्रीपूर्ण वातावरणमा प्रतिस्पर्धा गर्ने अवसर दिने मात्र नभई युवाहरूलाई सकारात्मक क्रियाकलापमा जोड्ने वातावरण सिर्जना गर्ने अपेक्षा गरिएको छ।

स्थानीय युवाहरूका लागि खेल मैदान केवल प्रतिस्पर्धाको थलो मात्र नभई अनुशासन, नेतृत्व र सहकार्य सिक्ने विद्यालय बनेको क्लबका पदाधिकारीहरूको भनाइ छ।

ब्रदर्स फुटबल क्लबले खेलकुदसँगै सामाजिक उत्तरदायित्वलाई पनि प्राथमिकतामा राख्दै आएको छ। आपतकालीन सहयोग, रक्तदान अभियानमा सहकार्य, तथा स्थानीय कार्यक्रमहरूमा सक्रिय सहभागिता जस्ता कार्यमार्फत क्लबले समुदायप्रति आफ्नो प्रतिबद्धता देखाएको छ।

स्थानीय तहका प्रतिनिधिहरूले समेत क्लबको पहललाई प्रशंसनीय भन्दै आगामी दिनमा यस्ता गतिविधिलाई थप संस्थागत र दिगो बनाउन सहकार्य गर्ने प्रतिबद्धता व्यक्त गरेका छन्।

युवा शक्ति संगठित भएर सकारात्मक उद्देश्यका लागि अघि बढ्दा समाज परिवर्तन सम्भव हुन्छ भन्ने उदाहरण ब्रदर्स फुटबल क्लबले प्रस्तुत गरेको छ। खेलकुदमार्फत सामाजिक सद्भाव, पारदर्शिता र विकासको अभियानलाई निरन्तरता दिन स्थानीय बासिन्दा, अभिभावक तथा सम्पूर्ण खेलप्रेमीहरूले क्लबलाई साथ र समर्थन दिनु आवश्यक देखिन्छ।

समुदायको उन्नति र युवाको सशक्तीकरणका लागि अघि बढिरहेको यस्तो प्रयासलाई प्रोत्साहन गर्नु हामी सबैको दायित्व हो।

ब्रदर्स फुटबल क्लब: खेलकुद मात्र होइन, समाज रूपान्तरणको अभियान पनि हो।