राष्ट्रिय रक्षा आधुनिकीकरणमा जोड

बेइजिङ — चीनको राष्ट्रिय जनकांग्रेसको वार्षिक अधिवेशनमा सहभागी सैन्य प्रतिनिधिहरूले राष्ट्रपति सि चिनफिङले दिएको महत्वपूर्ण सम्बोधनमाथि गहन अध्ययन र छलफल गरेका छन्। सैन्य प्रतिनिधिमण्डलका प्रवक्ता चाङ सियाओगाङले मंगलबार जानकारी दिँदै उक्त सम्बोधनले चिनियाँ सेनामा राजनीतिक निष्ठा सुदृढ गर्ने नीति र मार्गदर्शनलाई अझ समृद्ध र विकसित बनाएको बताएका छन्।

चीनका राष्ट्रपति तथा चिनियाँ कम्यूनिष्ट पार्टीका महासचिव र केन्द्रीय मिलिटरी कमिसनका अध्यक्ष सी चिनफिङले गत शनिबार सैन्य प्रतिनिधिमण्डलको पूर्ण बैठकमा सहभागी हुँदै राष्ट्रिय रक्षा तथा सशस्त्र बलको आधुनिकीकरणलाई निरन्तर र दिगो रूपमा अघि बढाउन सामूहिक प्रयास आवश्यक रहेकोमा जोड दिएका थिए। सीले विशेषगरी सेनाभित्र राजनीतिक निष्ठाको अद्वितीय शक्तिलाई पूर्ण रूपमा प्रयोग गर्दै सेनालाई अझ सक्षम, अनुशासित र आधुनिक बनाउने दिशामा काम गर्नुपर्ने बताएका थिए।

People’s Liberation Army तथा People’s Armed Police Force का प्रतिनिधिहरूले सि चिनफिङको निर्देशनलाई कार्यान्वयन गर्ने प्रतिबद्धता व्यक्त गरेका छन्। उनीहरूले केन्द्रीय सैन्य आयोगका अध्यक्षको अन्तिम जिम्मेवारी प्रणालीलाई प्रभावकारी रूपमा लागू गर्ने, राजनीतिक शुद्धीकरण प्रक्रियालाई अझ गहिरो बनाउने, व्यापक सैन्य तालिम र युद्ध तयारीलाई सुदृढ गर्ने तथा उच्च गुणस्तरीय विकासका लागि सामूहिक शक्ति परिचालन गर्ने संकल्प गरेका छन्।

राष्ट्रिय रक्षा तथा सेनाको आधुनिकीकरणका प्राथमिकताबारे जानकारी दिँदै प्रवक्ता चाङले सेनाले राजनीतिक मार्गदर्शनलाई अझ बलियो बनाउँदै राजनीतिक सुधारलाई गहिरो बनाउने बताएका छन्। साथै उन्नत युद्ध क्षमताको विकास, सैन्य प्रशासन र शासन प्रणालीलाई आधुनिक बनाउने तथा जनसेनाको नेतृत्व र व्यवस्थापनसँग सम्बन्धित संस्थागत संरचना सुधार गर्ने कार्यलाई प्राथमिकता दिइने उनले उल्लेख गरे। चीनले राष्ट्रिय रणनीति र समग्र रणनीतिक क्षमताको समन्वित विकासलाई पनि बलियो बनाउने योजना अघि सारेको छ।

यसैबीच सन् २०२६ का लागि चीनको राष्ट्रिय बजेटमा रक्षा खर्च उल्लेखनीय रूपमा बढाइने अपेक्षा गरिएको छ। प्रस्तावित बजेटअनुसार राष्ट्रिय रक्षा खर्च अघिल्लो वर्षको वास्तविक खर्चको तुलनामा ६ दशमलव ९ प्रतिशतले बढ्नेछ भने केन्द्रीय सरकारको रक्षा सम्बन्धी खर्च करिब ७ प्रतिशतले वृद्धि हुने अनुमान गरिएको छ। प्रवक्ता चाङका अनुसार रक्षा बजेट वृद्धि चार प्रमुख क्षेत्रमा केन्द्रित हुनेछ।

सबैभन्दा पहिले सेनाको समग्र विकासलाई मेकानाइजेसन, इन्फरमेटाइजेसन र स्मार्ट प्रविधिको प्रयोगमार्फत एकीकृत रूपमा अघि बढाइनेछ। यसका साथै संयुक्त सैन्य सञ्चालन प्रणालीलाई अझ प्रभावकारी बनाउने र उन्नत युद्ध क्षमताको विकासलाई तीव्र बनाइनेछ। रक्षा खर्चको अर्को महत्वपूर्ण हिस्सा आधुनिक हतियार प्रणाली र रक्षा प्रविधिमा नवप्रवर्तनलाई तीव्र बनाउने दिशामा खर्च गरिनेछ। आधुनिक रसद प्रणाली निर्माण, वास्तविक युद्ध परिस्थितिमा आधारित सैन्य तालिम तथा सेनाभित्र राजनीतिक सुधारलाई निरन्तर अघि बढाउने कार्यमा पनि यो बजेट प्रयोग गरिने बताइएको छ।

चाङले चीनको सेनाले राष्ट्रिय एकता र सार्वभौमसत्ताको संरक्षणलाई सर्वोच्च प्राथमिकतामा राख्ने स्पष्ट पारे। उनले विशेषगरी “ताइवान स्वतन्त्रता” का नाममा हुने पृथकतावादी गतिविधिविरुद्ध कडा रूपमा उभिने र बाह्य हस्तक्षेपको दृढतापूर्वक विरोध गर्ने चेतावनी दिए। चीनले ताइवानसँग शान्तिपूर्ण पुनःएकीकरणको पक्षमा अत्यधिक इमान्दारी र प्रयासका साथ काम गरिरहेको भए पनि आवश्यक परे बल प्रयोगको विकल्प त्याग्ने वाचा नगरेको उनले स्पष्ट पारे।

उनका अनुसार चिनियाँ सशस्त्र बलले युद्ध तयारी र सैनिक तालिमलाई अझ तीव्र बनाउनेछ, युद्ध जित्ने क्षमतालाई निरन्तर सुदृढ गर्नेछ र कुनै पनि पृथकतावादी प्रयास वा बाह्य हस्तक्षेपलाई असफल बनाउनेछ। यसमार्फत ताइवान जलडमरूमध्य क्षेत्रमा शान्ति र स्थायित्व कायम राख्ने लक्ष्य राखिएको उनले बताए।

यसरी राष्ट्रिय जनकांग्रेसको अधिवेशनमा उठेका विषयहरूले चीनले आफ्नो रक्षा नीति र सैन्य आधुनिकीकरणलाई नयाँ उचाइमा पुर्‍याउने रणनीति अघि बढाइरहेको संकेत दिएका छन्। राष्ट्रपति सि चिनफिङको निर्देशनपछि चिनियाँ सेनाले राजनीतिक निष्ठा, उन्नत प्रविधि र युद्ध तयारीलाई केन्द्रमा राख्दै आगामी वर्षहरूमा राष्ट्रिय सुरक्षालाई अझ सुदृढ बनाउने स्पष्ट संकेत दिएको छ।