खाडी मुलुकले अमेरिकासँग मुद्रा स्वाप लाइन मागे : युद्धले आर्थिक गतिविधि प्रभावित
काठमाडौं — अमेरिकी ट्रेजरी सचिव स्कट बेसेण्टले तेलले सम्पन्न अमेरिकी सहयोगी खाडी मुलुकहरूले मध्यपूर्व युद्धका कारण सिर्जित आर्थिक अस्थिरताबीच अमेरिकासँग मुद्रा स्वाप लाइन (करेन्सी स्वाप लाइन) मागेको बताएका छन्।
बेसेण्टले सेनेटको विनियोजन उपसमितिको बजेट सुनुवाइमा सन् २०२७ को ट्रेजरी विभागको बजेटबारे साक्षी दिँदै भने, ‘हाम्रा धेरै खाडी सहयोगी मुलुकले स्वाप लाइन मागेका छन्।’
फेडरल रिजर्भ वा ट्रेजरीबाट उपलब्ध गराइने यस्तो व्यवस्था डलर वित्तिय बजारमा स्थायित्व कायम राख्न र अमेरिकी सम्पत्तिको अव्यवस्थित बिक्री रोक्नका लागि गरिएको उनले बताए।
बेसेण्टका अनुसार यस्तो स्वाप लाइन अमेरिका र संयुक्त अरब इमिरेट्स (यूएई) दुवैका लागि लाभदायक हुन सक्छ। एसियाका केही मुलुकसहित अन्य देशले पनि यस्तै अनुरोध गरेका छन्।
क्षेत्रीय द्वन्द्वले खाडी क्षेत्रको आर्थिक गतिविधि बाधित बनाएको अवस्थामा यी अनुरोध आएका हुन्। हर्मुज जलसन्धि बन्द हुँदा तेल राजस्व थप प्रभावित भएको छ।
मुद्रा स्वाप लाइनले साझेदार मुलुकलाई डलर तरलता उपलब्ध गराउनेछ। केही अमेरिकी सञ्चारमाध्यमले यसले उपभोक्ता मूल्य बढ्नेजस्ता आन्तरिक आर्थिक प्रभाव पर्नेबारे चिन्ता व्यक्त गरेका छन्।
मंगलबार सीएनबीसीसँगको अन्तर्वार्तामा अमेरिकी राष्ट्रपति डोनाल्ड ट्रम्पले सम्भव भए यूएईलाई सहयोग गर्न चाहेको बताएका थिए।
तर एक डेमोक्र्याट सांसदले सुनुवाइमा यूएई–अमेरिका सम्बन्धबारे हालैका प्रतिवेदन (खाडी राष्ट्रको सरकारले ट्रम्प परिवारको व्यवसायमा गरेको लगानीसम्बन्धी) उठाएको बताइएको छ।
