च्यासल क्षेत्रमा खोलाको बहाव बढेपछि गृहमन्त्री गुरुङद्वारा स्थलगत अवलोकन
ड्रागन मिडिया सम्वाददाता
निरन्तर वर्षाका कारण ललितपुरको च्यासल क्षेत्रमा खोलाको बहाव बढेपछि गृहमन्त्री सुधन गुरुङ शुक्रबार स्थलगत अवलोकनका लागि पुगेका छन्। नेकपा एमालेको केन्द्रीय कार्यालय आसपासको क्षेत्रको अवस्था बुझ्न उनी सुरक्षाकर्मीसहित त्यहाँ पुगेका हुन्।
प्राप्त तस्बिरमा गृहमन्त्री गुरुङ सुरक्षाकर्मीका साथ च्यासल क्षेत्रमा पैदल हिँडिरहेको देखिन्छ। तर तस्बिरमा खोलाको सतह, पार्टी कार्यालयमा भएको सम्भावित क्षति वा डुबानको अवस्था देखिँदैन। स्थलगत अवलोकनपछि उनले दिएको निर्देशन वा त्यहाँ भएको क्षतिबारे आधिकारिक विवरण पनि प्राप्त भएको छैन।
बुधबारदेखि जारी वर्षापछि काठमाडौं उपत्यकाका नदी तथा खोलामा पानीको बहाव बढेको छ। यसअघि भक्तपुरको मनोहरा र हनुमन्ते खोला आसपासका बासिन्दालाई सुरक्षाकर्मीले सतर्क रहन आग्रह गरेका थिए। खोलाको पानी थप बढ्न सक्ने भएकाले तटीय क्षेत्रमा सावधानी अपनाउन र आधिकारिक सूचनाका आधारमा मात्र आवतजावत गर्न स्थानीय प्रशासनले अनुरोध गरेको छ।
