परराष्ट्रमन्त्री खनाल र राष्ट्रसङ्घका उपमहासचिव खरेबीच शान्ति स्थापनाबारे छलफल
ड्रागन मिडिया सम्वाददाता
परराष्ट्रमन्त्री शिशिर खनालले संयुक्त राष्ट्रसङ्घका उपमहासचिव तथा सञ्चालन सहयोग विभागका प्रमुख अतुल खरेसँग राष्ट्रसङ्घीय शान्ति स्थापना अभियानमा नेपाल र राष्ट्रसङ्घबीचको सहकार्यबारे छलफल गरेका छन्। संयुक्त राष्ट्रसङ्घको ८१औँ महासभाका क्रममा न्युयोर्कमा शुक्रबार उनीहरूबीच भेट भएको परराष्ट्रमन्त्रीको सचिवालयले जनाएको छ।
भेटमा खनालले राष्ट्रसङ्घीय शान्ति स्थापना अभियानमा नेपाली सैनिक तथा सुरक्षाकर्मीको दीर्घकालीन योगदान उल्लेख गर्दै नेपाल यस क्षेत्रमा प्रतिबद्ध रहेको बताए। अभियानमा खटिने नेपाली जनशक्तिले सामना गर्ने सञ्चालन तथा व्यवस्थापनसम्बन्धी विषय र आवश्यक सहयोगबारे पनि छलफल भएको सचिवालयले जनाएको छ।
खरे नेतृत्वको सञ्चालन सहयोग विभागले राष्ट्रसङ्घका अभियान र निकायलाई आवश्यक व्यवस्थापकीय तथा सञ्चालन सहयोग उपलब्ध गराउँछ। भेटमा कुनै नयाँ समझदारी वा निर्णय भएको विवरण भने सार्वजनिक गरिएको छैन।
