युरेसियाली बहुध्रुवीयता सम्बन्धी बडापत्र तयार गर्न नौ देशद्वारा वार्ता शुरु
ड्रागन मिडिया समाचार कक्ष
बेलारुस, इरान, कजाखस्तान, किर्गिस्तान, लाओस, म्यानमार, रुस, ताजिकिस्तान र भियतनामले ‘एक्काइसौँ शताब्दीमा विविधता र बहुध्रुवीयताको युरेसियाली बडापत्र’ तयार गर्ने औपचारिक वार्ता शुरु गरेका छन्। संयुक्त राष्ट्रसंघको महासभाको ८१औँ अधिवेशनका क्रममा शुक्रबार न्युयोर्कमा भएको भेटपछि नौ देशका प्रतिनिधिले संयुक्त वक्तव्य जारी गरेका हुन्।
वक्तव्यमा संयुक्त राष्ट्रसंघको बडापत्र र अन्तर्राष्ट्रिय कानुनप्रति प्रतिबद्धता दोहोर्याउँदै सबै राष्ट्रको सार्वभौम समानता, राजनीतिक स्वतन्त्रता, भौगोलिक अखण्डता, आन्तरिक मामिलामा अहस्तक्षेप र विवादको शान्तिपूर्ण समाधानमा जोड दिइएको छ। बहुध्रुवीय विश्व व्यवस्थामा राष्ट्रसंघको केन्द्रीय समन्वयकारी भूमिका र साना ठूला सबै देशका लागि समान अवसर सुनिश्चित हुनुपर्ने उनीहरूको धारणा छ।
प्रस्तावित बडापत्रमा युरेसियाली क्षेत्रमा साझा सुरक्षा, आर्थिक साझेदारी, सांस्कृतिक तथा मानवीय सम्बन्ध र सभ्यताबीचको आदानप्रदानका सिद्धान्त समेट्ने उद्देश्य राखिएको छ। वार्ता प्रक्रियामा इच्छुक सबै युरेसियाली देश सहभागी हुन सक्नेछन्। बडापत्रको मस्यौदा, त्यसको कानुनी हैसियत र अनुमोदन प्रक्रियासहित सबै महत्त्वपूर्ण निर्णय सर्वसम्मतिबाट गर्ने सहमति भएको छ।
वार्ता सञ्चालन र मस्यौदा तयार गर्न कार्यदल गठन गरिएको छ। प्रस्तावित बडापत्रको अवधारणा सन् २०२३ अक्टोबरमा बेलारुसको मिन्स्कमा आयोजित युरेसियाली सुरक्षासम्बन्धी अन्तर्राष्ट्रिय सम्मेलनमा अघि सारिएको थियो।
