चीन र इन्डोनेसियाबीच संयुक्त आतंकवादविरोधी सैन्य अभ्यास शुरु
ड्रागन मिडिया समाचार कक्ष
चीनको दक्षिणी ग्वाङ्दोङ प्रान्तमा चीन र इन्डोनेसियाबीचको ‘तीक्ष्ण धार–२०२६’ संयुक्त स्थलसेना आतंकवादविरोधी अभ्यासको उद्घाटन समारोह मंगलबार सम्पन्न भएको छ। समारोहपछि दुवै देशका सैनिकले विशेष तालिम शुरु गर्ने कार्यक्रम छ।
अभ्यासमा खोज तथा निगरानी, सञ्चार, मानवरहित प्रणाली, टाढाबाट निशाना लगाउने सीप र आतंकवादविरोधी कारवाहीसम्बन्धी तालिम समावेश छन्। सैनिकहरूलाई मिश्रित समूहमा राखेर उपतालिम, रणनीतिक समन्वय र संयुक्त अभ्यास गराइनेछ।
चिनियाँ रक्षा मन्त्रालयका अनुसार अभ्यासमा पहाडी क्षेत्रमा संयुक्त उद्धार तथा आतंकवादविरोधी कारवाहीमा विशेष जोड दिइएको छ। पर्वतारोहण, विशेष सवारीसाधन सञ्चालन, हेलिकोप्टरबाट डोरीको सहायताले ओर्लने, नजिकबाट आक्रमण गर्ने र सैनिक तथा मानवरहित प्रणालीबीच समन्वय गर्ने अभ्यास पनि हुनेछन्।
दुवै पक्षले विषयगत छलफल, हतियार तथा उपकरण प्रदर्शन, खेलकुद प्रतियोगिता र सांस्कृतिक आदानप्रदानसमेत गर्नेछन्। यो संयुक्त अभ्यास शृङ्खलाको तेस्रो संस्करण हो। नोभेम्बरको शुरुमा सम्पन्न हुने अभ्यासले दुई देशका सेनाबीच व्यावहारिक सहकार्य र संयुक्त कारवाही क्षमता बढाउने चिनियाँ रक्षा मन्त्रालयले जनाएको छ।
