रुसी कूटनीतिज्ञ देस्यात्निकोभ संयुक्त राष्ट्रसङ्घका सहायक महासचिव नियुक्त
ड्रागन मिडिया समाचार कक्ष
संयुक्त राष्ट्रसङ्घका महासचिव एन्टोनियो गुटेरेसले रुसी कूटनीतिज्ञ ग्लेभ देस्यात्निकोभलाई शान्ति सञ्चालन विभागअन्तर्गत बारुदी सुरुङसम्बन्धी कार्य तथा प्रहरी मामिलाका लागि सहायक महासचिव नियुक्त गरेका छन्। संयुक्त राष्ट्रसङ्घले अक्टोबर २७ मा नियुक्तिको घोषणा गरेको हो।
देस्यात्निकोभसँग अन्तर्राष्ट्रिय सम्बन्ध, राजनीतिक मामिला र सुरक्षा क्षेत्रमा ३५ वर्षभन्दा बढीको अनुभव रहेको संयुक्त राष्ट्रसङ्घले जनाएको छ। उनले सन् २०१८ देखि नियुक्तिअघि सम्म जोर्डनका लागि रुसी राजदूतका रूपमा काम गरेका थिए। त्यसअघि सन् २०१० देखि २०१८ सम्म रुसी विदेश मन्त्रालयको मध्यपूर्व तथा उत्तर अफ्रिका विभागका उपनिर्देशक थिए।
उनले सन् २००४ देखि २०१० सम्म संयुक्त राष्ट्रसङ्घका लागि रुसी स्थायी नियोगमा मध्यपूर्व तथा उत्तर अफ्रिका मामिलासम्बन्धी वरिष्ठ सल्लाहकार र सन् २००० देखि २००४ सम्म रुसी विदेश मन्त्रालयमा इराक तथा जोर्डनसम्बन्धी राजनीतिक विभागका प्रमुखका रूपमा काम गरेका थिए। सन् १९९७ देखि २००० सम्म उनी जोर्डनस्थित रुसी दूतावासमा कार्यरत थिए। सन् १९९४ देखि १९९७ बीच उनले इराकसम्बन्धी संयुक्त राष्ट्रसङ्घीय विशेष आयोगमा पनि विभिन्न जिम्मेवारी सम्हालेका थिए।
देस्यात्निकोभले मस्को राज्य अन्तर्राष्ट्रिय सम्बन्ध संस्थानबाट अन्तर्राष्ट्रिय सम्बन्धमा स्नातकोत्तर गरेका छन्। उनी रुसी भाषाका अतिरिक्त अङ्ग्रेजी र अरबी भाषामा पनि दक्ष छन्।
