चिनियाँ कम्युनिस्ट पार्टीको पूर्ण तथा कठोर आत्मशासनसम्बन्धी प्रस्ताव पारित
ड्रागन मिडिया समाचार कक्ष
चिनियाँ कम्युनिस्ट पार्टीको २०औँ केन्द्रीय समितिको पाँचौँ पूर्ण बैठकले पार्टीको पूर्ण तथा कठोर आत्मशासनलाई निरन्तरता दिने प्रस्ताव पारित गरेको छ। सोमबारदेखि बिहीबारसम्म बेइजिङमा भएको बैठकले पार्टी अनुशासन, भ्रष्टाचार नियन्त्रण र शासन क्षमता सुदृढ गर्ने विषयलाई प्राथमिकता दिएको बैठकपछि जारी विज्ञप्तिमा उल्लेख छ।
चिनियाँ कम्युनिस्ट पार्टीको केन्द्रीय राजनीतिक ब्युरोको अध्यक्षतामा भएको बैठकमा महासचिव सी चिनफिङले सम्बोधन गरेका थिए। पार्टीका सदस्यमा राजनीतिक निष्ठा, आचरण र अनुशासन बलियो बनाउने, अधिकारीको व्यवस्थापन कडा पार्ने तथा भ्रष्टाचारको अवसर र प्रलोभन रोक्ने प्रणाली विकास गर्ने विषयमा प्रस्तावले जोड दिएको छ।
भ्रष्टाचार नियन्त्रणका लागि कडा कारबाही, लक्षित सुधार र प्रभावकारी रोकथामलाई एकीकृत रूपमा अघि बढाउने बैठकको निष्कर्ष छ। सन् २०२५ मा देशभरका अनुशासन तथा निगरानी निकायले जनजीवनसँग सम्बन्धित अनियमितता र भ्रष्टाचारका नौ लाख ६७ हजार मुद्दा अनुसन्धान गरेको तथा करिब ७७ अर्ब ६० करोड युआन बराबरको रकम र सम्पत्ति फिर्ता वा पुनःप्राप्त गर्न सहयोग गरेको सरकारी विवरणमा उल्लेख छ।
बैठकले सन् २०२७ को दोस्रो अर्धवार्षिकमा पार्टीको २१औँ राष्ट्रिय महाधिवेशन बेइजिङमा आयोजना गर्ने निर्णय गरेको छ। सन् २०२६–२०३० को पन्ध्रौँ पञ्चवर्षीय योजनाका लक्ष्य पूरा गर्न पार्टीको नेतृत्व र शासन क्षमता बलियो बनाउनुपर्ने विषयमा पनि छलफल भएको थियो। बैठकले झाङ शङमिनलाई पार्टीको केन्द्रीय राजनीतिक ब्युरोको नयाँ सदस्यका रूपमा चयन गरेको विज्ञप्तिमा उल्लेख छ।
