होनोलुलु विमानस्थलमा हिरासतको जोखिमबारे चीनको चेतावनी

ड्रागन मिडिया समाचार कक्ष

अमेरिकाको होनोलुलुस्थित डानियल के. इनुये अन्तर्राष्ट्रिय विमानस्थल हुँदै प्रवेश गर्न खोज्ने केही चिनियाँ नागरिकमाथि मनपरी सोधपुछ र दुर्व्यवहार भएको भन्दै लस एन्जलसस्थित चिनियाँ महावाणिज्य दूतावासले आफ्ना नागरिकलाई सतर्क रहन आग्रह गरेको छ।

महावाणिज्य दूतावासले बिहीबार जारी गरेको यात्रासम्बन्धी सूचनाअनुसार, केही चिनियाँ नागरिकका भिसा रद्द गरी उनीहरूलाई अमेरिकाबाट फिर्ता पठाइएको छ। उनीहरूका विद्युतीय उपकरण जाँच गरिएको, लामो समय हिरासतमा राखिएको र बाहिरी संसारसँग सम्पर्क गर्न नदिइएको दूतावासले जनाएको छ। फिर्ती उडानको प्रतीक्षामा रहेका उनीहरूलाई होनोलुलुस्थित संघीय हिरासत केन्द्रमा सारिएको पनि सूचनामा उल्लेख छ।

घटनाबारे अमेरिकी पक्षसमक्ष पटकपटक गम्भीर आपत्ति जनाइएको महावाणिज्य दूतावासले बताएको छ। उक्त विमानस्थल हुँदै अमेरिका प्रवेश गर्न खोज्ने चिनियाँ नागरिकले सोधपुछ, दुर्व्यवहार र हिरासतको जोखिम सामना गर्न सक्ने भन्दै त्यहाँबाट प्रवेश गर्ने योजना बनाएकाहरूलाई सावधानी अपनाउन आग्रह गरिएको छ।

अमेरिका जाने चिनियाँ नागरिकलाई प्रवेशसम्बन्धी नियम पहिले नै बुझेर आवश्यक तयारी गर्न पनि दूतावासले सुझाव दिएको छ। सीमा अधिकारीले सोधपुछ गर्दा शान्त रहन र संयमित रूपमा जवाफ दिन आग्रह गर्दै, प्रश्न नबुझेमा गलत बुझाइबाट बच्न दोभाषेको सहयोग माग्न सकिने जनाएको छ।