फुजोउमा चीन–अमेरिका जनमैत्री सम्बन्धमा केन्द्रित मञ्च सुरु

ड्रागन मिडिया समाचार कक्ष

चीन र अमेरिकाका नागरिकबीचको सम्बन्ध सुदृढ गर्ने तथा व्यावहारिक सहकार्यका उपाय खोज्ने उद्देश्यसहित सन् २०२६ को कु लियाङ मञ्च बुधबार चीनको फुजियान प्रान्तस्थित फुजोउमा सुरु भएको छ। पिपुल्स डेली डिजिटल कम्युनिकेसन्स कम्पनीले आयोजना गरेको मञ्च यसपटक पहिलोपटक कु लियाङको शताब्दी पुरानो मैत्री कथाको सुरुआत भएको सहरमा आयोजना गरिएको हो।

‘एकअर्कातर्फ अघि बढौँ’ भन्ने मूल विषयमा केन्द्रित मञ्चमा सहभागीहरूले चीन–अमेरिका मित्रताको इतिहास र भविष्य, भाषा तथा सांस्कृतिक आदानप्रदानले नागरिकलाई नजिक ल्याउने उपाय र युवालाई भेटघाट, सिकाइ तथा सहकार्यका अवसर दिने विषयमा विचार आदानप्रदान गरेका थिए।

उद्घाटन समारोहमा पिपुल्स डेलीका अध्यक्ष यू शाओलियाङले मञ्चले दुवै देशका नागरिकबीच संवाद र सांस्कृतिक आदानप्रदान बढाउन भूमिका खेल्ने विश्वास व्यक्त गरे। उनले दुई देशका राष्ट्रप्रमुखबीच बनेका महत्त्वपूर्ण समझदारीलाई मार्गदर्शनका रूपमा लिँदै मित्रताका अनुभव साझा गर्न, सहकार्यलाई समर्थन गर्न र आपसी विश्वास गहिरो बनाउन विभिन्न क्षेत्रका व्यक्तिलाई आह्वान गरे।

सञ्चारमाध्यम, विचार अनुसन्धान संस्था, विश्वविद्यालय, व्यवसायिक क्षेत्र र स्थानीय समुदायले मञ्चलाई शिक्षा, विज्ञान तथा प्रविधि, व्यापार र संस्कृतिमा सहकार्य विस्तार गर्ने पुलका रूपमा उपयोग गर्नुपर्ने उनको भनाइ थियो। नागरिकबीच भ्रमण र भेटघाट बढाएर दुवै देशका जनतालाई नजिक ल्याउन तथा पारस्परिक लाभ हुने व्यावहारिक परिणाम हासिल गर्नुपर्नेमा उनले जोड दिए। फुजियान प्रान्तीय समितिका सचिव झाओ लङ र फुजोउ नगर समितिका सचिव छिन हाइश्याङ पनि मञ्चमा सहभागी भएका थिए।

अमेरिकी सहभागीहरूले भाषा सिकाइ, साझा अनुभव र दैनिक जीवनका संवादले व्यक्तिगत सम्बन्ध र आपसी समझदारी विकास गर्न मद्दत गर्ने बताए। हेलेन फोस्टर स्नो प्रतिष्ठान तथा गुङ हो कार्यक्रमका कार्यकारी निर्देशक एरिक चिपम्यानले नागरिकबीचको आदानप्रदान केवल एकअर्कालाई टाढाबाट नियाल्ने अवसरमा सीमित हुन नहुने बताए। मानिसहरू एकअर्काको जीवन र काममा सहभागी भएर साझा लक्ष्यमा अघि बढ्दा वास्तविक सम्बन्ध बन्ने उनको धारणा थियो।

चीन–अमेरिका आदानप्रदान कार्यक्रम सञ्चालन गरेको करिब दुई दशकको अनुभव सुनाउँदै चिपम्यानले चीनको प्रत्यक्ष अनुभवले युवाको दृष्टिकोणमा गहिरो प्रभाव पार्न सक्ने बताए। चीन भ्रमणपछि केही विद्यार्थीले त्यहाँ अध्ययन वा काम गरेको र अरूलाई पनि चीन जान प्रोत्साहित गरेको उनले उल्लेख गरे। कु लियाङको इतिहासले दुवै देशका नागरिकबीच लामो समयदेखि रहँदै आएको सम्बन्ध सम्झाउने भन्दै उनले भविष्यमा अमेरिकी विद्यार्थीलाई कु लियाङ ल्याउने इच्छा पनि व्यक्त गरे।

छिङ्ह्वा विश्वविद्यालयका पूर्वविद्यार्थी २७ वर्षीय ट्रेन्टन मार्सोलेकले कु लियाङको कथा र त्यसले प्रतिनिधित्व गर्ने मित्रता चीन–अमेरिका सम्बन्धका लागि अर्थपूर्ण रहेको बताए। राजनीतिक वा दार्शनिक विषयबाटै संवाद थाल्न आवश्यक नरहेको उनको भनाइ थियो। सामान्य विषयमा हुने कुराकानीले मानिसलाई एकअर्कालाई व्यक्तिका रूपमा बुझ्न र आपसी समझदारी बढाउन मद्दत गर्ने उनले बताए।

पेइचिङ विश्वविद्यालयमा चिनियाँ भाषा पढ्ने चिनियाँ–अमेरिकी विद्यार्थी भिभियनले भाषा सिकाइलाई संस्कृति, दैनिक जीवन र कथाबाट अलग गर्न नसकिने बताइन्। मञ्चले अमेरिकी विद्यार्थी र अन्य पाहुनालाई कु लियाङको इतिहासबारे जान्ने र चिनियाँ संस्कृतिलाई प्रत्यक्ष अनुभव गर्ने अवसर दिएको उनको भनाइ थियो।

यस वर्षको मञ्चमा छलफल र युवा आदानप्रदानका कार्यक्रम पनि भएका थिए। सहभागीहरूले प्रमुख देशबीच रचनात्मक सम्बन्धको महत्त्व, चीन–अमेरिका सम्बन्धका लागि इतिहासबाट लिन सकिने पाठ र दुई देशका नागरिकबीचको मित्रता गहिरो बनाउने उपायबारे छलफल गरे।

कार्यक्रममा ‘कु लियाङसँगको सम्बन्ध : चीन–अमेरिका मित्रता र सहकार्यका कथा’ नामक पुस्तक सार्वजनिक गरिएको थियो। दुवै देशका नागरिकबीचको आदानप्रदान र मित्रता झल्काउने तस्बिरहरूको प्रदर्शनी पनि आयोजना गरिएको थियो।

सन् २०२४ मा सुरु भएको कु लियाङ मञ्चका यसअघिका दुई संस्करण बेइजिङ र न्युयोर्कमा भएका थिए। चीन र अमेरिकाका विभिन्न क्षेत्रका ३०० भन्दा बढी सहभागीलाई जोडिसकेको मञ्च दुवै देशका नागरिकबीच संवाद र आदानप्रदान गर्ने साझा थलोका रूपमा विकसित भएको आयोजकले जनाएको छ।