नयाँ राष्ट्रसङ्घ महासचिव वर्षान्तसम्म चयन गर्नुपर्ने रूसको भनाइ
ड्रागन मिडिया समाचार कक्ष
राष्ट्रसङ्घको नयाँ महासचिव आगामी डिसेम्बर ३१ भित्र चयन गरिसक्नुपर्ने रूसी विदेश मन्त्रालयका अधिकारी किरिल लोग्भिनोभले बताएका छन्। महासचिवको कार्यकाल सकिएपछि विश्व संस्थाको प्रशासनिक नेतृत्व कसले सम्हाल्ने भन्ने अन्योल रोक्न समयमै नियुक्ति आवश्यक रहेको उनले बताए।
किर्गिस्तानको राजधानी बिश्केकमा द्विपक्षीय परामर्शका क्रममा ताससँग कुरा गर्दै अन्तर्राष्ट्रिय सङ्गठन विभागका निर्देशक लोग्भिनोभले वर्तमान महासचिवको कार्यकाल डिसेम्बर ३१ मा सकिने बताए। उम्मेदवारसँग प्रत्यक्ष संवाद र प्रारम्भिक मतदानका चरण सञ्चालन गरेर वर्षान्तअघि नियुक्ति प्रक्रिया पूरा गर्न प्रयास भइरहेको उनको भनाइ थियो।
वर्षान्तपछि के हुन्छ भन्ने स्पष्ट नभएको भन्दै उनले केही विकल्पमाथि छलफल भइरहेको बताए। तीमध्ये वर्तमान महासचिवको कार्यकाल अस्थायी रूपमा थप्ने वा उनका कुनै एक उपमहासचिवलाई कार्यवाहक महासचिव नियुक्त गर्ने विकल्प छन्।
उपमहासचिवहरूको भावी योजनाले पनि प्रक्रियालाई असर गर्न सक्ने लोग्भिनोभले बताए। केही उपमहासचिवले पद छाड्ने योजना बनाएको र प्रथम उपमहासचिवको कार्यकाल महासचिवको कार्यकालसँग जोडिएको उनले उल्लेख गरे। महासचिवले पद छाडेपछि प्रथम उपमहासचिव स्वतः नेतृत्वमा आउने व्यवस्था नरहेको भन्दै उनले यसले टार्न सकिने अन्योल निम्त्याउन सक्ने बताए।
