दुबईको आकाशमा ठोक्किए मिसाइलको भग्नावशेष : अरवको सुरक्षा कवचले चिर्न सकेन त्रास

दुबई – संयुक्त अरब इमिरेट्स (यूएई) को दुबई इन्टरनेट सिटीस्थित ‘ओराकल’ भवनमा हवाई प्रतिरक्षा प्रणालीले रोकेको एउटा क्षेप्यास्त्रको भग्नावशेष ठोक्किएको छ। दुबई मिडिया अफिसले शनिबार यो जानकारी दिँदै घटनामा कुनै पनि मानवीय क्षति नभएको स्पष्ट पारेको छ। भग्नावशेषले भवनको बाहिरी भागमा केही क्षति पुर्याएको तर त्यो सीमित मात्रामा रहेको अधिकारीहरूले जनाएका छन्।

यसभन्दा केही समयअघि मात्रै दुबई मरिना क्षेत्रमा पनि यस्तै घटना घटेको थियो। हवाई प्रतिरोधको क्रममा रोकिएको क्षेप्यास्त्रको टुक्रा एउटा भवनको बाहिरी भागमा ठोक्किएको थियो। त्यस घटनामा पनि कुनै मानवीय क्षति वा आगलागी नभएको अधिकारीहरूले पुष्टि गरेका छन्।

दुबई मिडिया अफिसले यी भग्नावशेषहरू सफल हवाई प्रतिरोधको परिणाम भएको बताउँदै जनतालाई आधिकारिक स्रोतबाट मात्र सूचना लिन आग्रह गरेको छ। अहिलेसम्म यी क्षेप्यास्त्र कहाँबाट प्रहार गरियो भन्नेबारे आधिकारिक रूपमा केही खुलाइएको छैन, तर क्षेत्रीय तनावको बीचमा दुबईको आकाशमा भएको यो घटनाले यूएईको सतर्कता र प्रतिरक्षा प्रणालीको क्षमतालाई उजागर गरेको छ।

राजनीतिक र सुरक्षा विश्लेषकहरूका अनुसार बढ्दो मध्यपूर्वी तनावका बीच खाडी मुलुकहरू उच्च सतर्कतामा छन्। यूएईले आफ्नो आकाश सुरक्षित राख्न अत्याधुनिक प्रतिरक्षा प्रणाली प्रयोग गर्दै आएको छ। भवनमा क्षति पुगे तापनि दुईवटा फरक स्थानमा भएको यी घटनामा ज्यानको हानि हुन नु नै ठूलो राहतको विषय हो। स्थानीय प्रशासनले भने सुरक्षाको उच्च सतर्कता कायमै राखेको छ र क्षति पुगेका भवनहरूको मर्मतको प्रक्रिया अघि बढाइएको छ। दुबईको आकाशमा ठोक्किएको त्यो भग्नावशेषले एउटै सन्देश दिन्छ – युद्धको आगो जहाँ सल्कियोस्, त्यसको धुवाँले टाढाको सहरलाई पनि छुन्छ। तर सुरक्षा बलियो भएमा सो क्षति न्यूनीकरण गर्न सकिन्छ।